په ازبکستان کې د "مانو" څېړنیز مرکز مشر ویلي دي چې په افغانستان کې لسګونه ترهګرې ډلې د منځنۍ اسیا د سیکولر رژیمونو د نسکورولو لپاره تیاری نیسي. د بختیار ارګاشیف په وینا، افغانستان د بېلابېلو ترهګرو ډلو لپاره د ودې پر مرکز بدل شوی دی.
هغه د ازبکستان له پادروبنای خبري اژانس سره په مرکه کې زیاته کړه: «په افغانستان کې بېلابلې افراطي او ترهګریز سازمانونه د هوساینې احساس کوي، له القاعدې نیولې بیا تر مخ پر زیاتېدونکو وسله والو سازمانونو پورې لکه داعش ـ خراسان، تروریستي ډله کتیبه امام بخاري او کتیبه توحید او جهاد، چې په تدریجي ډول له سوریې او عراق څخه افغانستان ته ځي.»
د امریکا د بهرنیو چارو وزارت د ۲۰۲۲ کال په مارچ میاشت کې اعلان وکړ چې د کتیبه توحید او جهاد ډله له القاعده شبکې سره تړاو لري.
د امريکا د بهرنيو چارو وزارت د دغې ډلې د فعاليتونو په بيانولو کې ويلي دي چې کتیبه توحيد ډله د سوريې په ادلب سيمه کې له التحرير الشام ډلې سره ګډ فعاليت کوي او له نورو ترهګرو ډلو لکه کنیبه امام بخاري او اسلامي جهاد سره همکاري کوي.
په ازبکستان کې د مانو څېړنيز مرکز مشر وويل، په افغانستان کې د دغو ترهګرو ډلو هدف منځنۍ اسيا ته ننوتل دي.
نوموړي په دې مرکه کې چې د شنبې په ورځ (د میزان په لومړۍ نېټه) خپره شوه، وویل: "افغانستان هغه ځای دی چې د افراطیت جراثیم په احتمالي او خطرناکه توګه وده کوي او دا ټولو ته ښکاره ده."
ده همداراز زیاته کړه: «افغانستان په اوسنیو حالاتو کې په بېلابېلو مسایلو کې د منځنۍ اسیا د هېوادونو لپاره د کړکېچ یو جدي لامل دی.»
د طالبانو ډلې سرچینو تراوسه د دغه ازبک محقق د نویو څرګندونو په اړه څه نه دی ویلی.
