د افغانستان د ازادۍ جبهې د یکشنبې په ماښام د یوې ویډیو په خپرولو سره خبر ورکړی، چې په مزارشریف کې يې د بلخ د مرکزي زندان په دروازه برید کړی دی. دغې جبهې په ایکس پاڼه ادعا کړې، چې په دې برید کې یو وسله وال طالب وژل شوی او درې نور ټپیان شوي دي.
په دې ویډیو کې د ډزو غږونه اوریدل کیږي، چې د ازادۍ جبهې په وینا، د بلخ پر زندان د برید سره تړاو لري.
تر اوسه خپلواکو سرچینو د دغه برید او مرګ ژوبلې پخلی نه دی کړی.
همدا راز ازادۍ جبهې ویلي چې د یکشنبې په ورځ د (تلې ۲مه) يې د اندراب ولسوالۍ په ده صلاح سیمه کې د طالبانو پر یوه پوسته برید کړی چې په ترڅ کې يې دوه تنه طالب وسله وال وژل شوي او دري تنه نور ټپیان شوي دي.
طالب ضد دغې وسله والې ډلې په روانه اوونې په کابل، بغلان او پروان ولایتونو کې درې نور بریدونه هم پر طالبانو کړي.
