صالح: د طالبانو له خوا پر طالبانو په شوي برید کې ۳۰ تنه وژل شوي او ګڼ نور ټپیان دي
د پخواني ولسمشر لومړی مرستیال امرالله صالح وايي، چې د دوشنبې په ورځ (د تلې درېیمه) په ارزګان ولایت کې د یوې ډلې طالبانو له خوا د طالبانو د ۲۰۵ قول اردو په څلورم کنډک برید شوی، چې پکې دېرش تنه وژل شوي او ګڼ نور ټپیان دي.
امر الله صالح پر خپلې اېکس(ټوېټر) پاڼې لیکلي، چې دغه برید د یو شمېر هغو طالبانو له خوا شوی، چې نامعلومو ځواکونو ته وفادار دي.
هغه زیاته کړې:” برید نن سهار شا او خوا دوه نیمې بجې شوی، ټپیان د میر حسن او فرهاد په نوم دوو پیلوټانو په هلیکوپټرو کې کندهار ته انتقال کړي دي”.
د ښاغلي صالح په خبره چې طالبان غواړي دغه پېښه پټه وساتي او د کنډک د قوماندان ملا اخوند په ګډون د ګڼو نورو ټپیانو روغتیايي وضعیت نازک دی.
دا د طالبانو په لیکو کې د خپل منځي شخړې یوه نوې پېښه ده، خو تر اوسه طالبانو د دغې پېښې په اړه څه نه دي ویلي.
افغانستان انټرنشنل – پښتو د یوې بې پرې رسنۍ په توګه نه شي کولی، چې د دغې پېښې پخلی وکړي؛ خو په دې وروستیو کې پر طالبانو د بریدونو پېښې ښيي، چې پر دغې ډلې د دوی د مخالفینو بریدونه زیات شوي دي.