د طالبانو د کورنیو چارو وزیر سره د ځینې کارپوهانو او فعالانو د کتنې یو ګډونوال جاوېد مومند وايي، ښاغلي حقاني ورته ويلي چې دا ډله د لویې جرګې د جوړولو پر طرحه خبرې او سلا مشورې کوي. ښاغلي مومند وویل، کارپوهانو هم سراج الدین حقاني ته وویل، چې د مشروعیت لپاره باید لویه جرګه وشي.
سیاسي شنونکي جاوېد مومند له افغانستان انټرنشنل سره په خبرو کې زیاته کړه، چې سراج الدین حقاني دا هم وویل، چې د طالبانو حکومت باید خپل ځای روا یا مشروع حکومت ته ور کړي او د دې کار لپاره اساسي قانون ته اړتیا ده.
نوموړي په دغه ناسته کې دا هم ویلي چې:«د عصري او ديني علم په نامه د علومو تر منځ د واټن رامنځته کول، زموږ د اکثرو ستونزو لامل ګرځېدلی.»
هغه زیاته کړې:« د فکري اختلاف ستونزه به هم په مشوره او یووالي هواره شي؛ خو مهمه دا ده، چې شته فرصتونه ضایع نه شي»
سراج الدين حقاني ويلي، چې د متقابل زغم له لارې اکثره ستونزې ختمېدای او د بدبينۍ او نفاق روحیه له منځه تلای شي.
تر سراج الدین حقاني وړاندې یو شمېر نورو طالب چارواکو هم د عصري علومو په پلوی او پر ښځینه او نارینه و د هغوی د فرض په اړه له بېلابېلو دریځونو څخه ورته څرګندونې کړې وې؛ خو تر اوسه د مدرسې او ښوونځيو ترمنځ شته واټن نه یوازې دا چې رالنډ شوی نه دی، بلکې د هرې ورځې په تېرېدو سره دغه واټن نور هم پسې اوږدېږي او ګڼ خلک دغه شان څرګندونې د طالبانو تش تور تبلیغات ګڼي.
هغوی وایي، د څه د پاسه دوو کلونو په اوږدو کې طالبان په دې نه دي توانیدلي چې د نجونو لپاره د دوی په وینا منظم او خوندي چاپېریال رامنځته او یا هم د هغوی لپاره نوی تعلیمي نصاب جوړ کړي.
