سرچینو افغانستان انټرنشنل ـ پښتو ته وویل، د خوست موساخېلو ولسوالۍ کې د طالبانو د اسخباراتو مدیر صیاد هغه مهال ووژل او دوه طالبان ټپیان شول چې له یوه درمل پلورونکي یې وسله غوښتله. سرچینې وايي، درمل پلورونکي صابر منګل پخوا کومه دولتي دنده نه درلوده.
ځايي سرچینو پنجشنبه د ـ میزان ۶ مه ـ افغانستان انټرنشنل ته وویل چې دغه شخړه نن شاوخوا ۱۱ بجې د خوست موساخېلو ولسوالۍ تپې په نامه سیمه کې رامنځته شوې ده.
د سرچینو په خبره، د موساخیلو ولسوالۍ لپاره د طالبانو د استخباراتو مدیر د صابر منګل په نوم ځايي اوسیدونکي ته ویل، یو میل دولتي وسله لرې او باید ویې سپارې.
سرچینې وايي، په خبرو کې د دواړو ترمنځ په ناندریو پسې لومړی صابر منګل د طالبانو پر استخباراتو مدیر ډزې وکړې او ویې واژه.
په دغه پیښه کې دوه نور طالبان ټپیان شوي دي.
سرچینې زیاتوي له دې پېښې وروسته صابر منګل د طالبانو لخوا په ډزو وژل شوی دی.
ځايي اوسیدونکي وايي صابر منګل په دغه سیمه کې درملتون درلود.
تراوسه پورې طالبانو د دې پيښې په تړاو په رسمي ډول څه نه دي ویلي.
