د امریکا د دفاع وزارت یوه پخواني لوړپوړي چارواکي ویلي، د ایران اسلامي جمهوریت له ۲۰۱۲ کال راهیسې طالبانو ته هر کال سل میلیونه ډالره ورکول. کارټر ملکاسیان ویلي، چې اسلامي جمهوریت په افغانستان کې دوه ګونې لوبه کوله.
ښاغلي ملکاسیان له افغانستان انټرنېشنل سره په مرکه کې ویلي، چې په افغانستان کې د امریکا د حضور په لومړۍ لسیزه کې له طالبانو سره د ایران مرستې کمې وې؛ خو له ۲۰۱۲ کال وروسته له طالبانو سره د ایران د اسلامي جمهوریت مرستې ډېرې شوې.
هغه زیاته کړه، چې د ایران د اسلامي جمهوریت سپاه پاسدارانو په بېلابېلو کچو له طالبانو سره خپلې مرستې زیاتې کړې او کلنۍ مرستې یې له سلو میلیونو ډالرو زیاتې کړې دي.
ښاغلی ملکاسیان چې یو پېژندل شوی تاریخ لیکونکی هم دی، په "افغانستان کې د امریکا د جګړې" په نوم یې یو کتاب لیکلی، چې په ۲۰۲۲ کال کې یې د "لیونل ګلبر جایزه" ګټلې وه.
ملکاسیان اوسمهال د کالیفورنیا په مونټه ري کې د متحده ایالاتو د سمندري ځواک په اکاډمۍ کې د دفاع لوړ پوړی شنونکی دی.
دغه جګپوړي امریکايي شنونکي ویلي، چې اسلامي جمهوریت له طالبانو سره په مرسته کې ان له پاکستان سره برابري کوله، په داسې حال کې چې روسیې له طالبانو سره د اسلامي جمهوریت په اندازه مرسته نه ده کړې.
هغه زیاته کړه: «په نړۍواله کچه له طالبانو بې ساري ملاتړ وشو. ایران په لوی ملاتړی بدل شوی و، چې په دې توګه و د پاکستان نفوذ وننګوي. له طالبانو سره د ایران مرستې له ۲۰۱۲ کال وروسته په کال کې له ۱۰۰ میلیونو ډالرو څخه زیاتې شوې او تقریباً د پاکستان سره برابرې دي.»
