سیمهییزې سرچینې: د غزني په ناور کې طالب جنګیالیو د یوه سړي د بدن غوښه پرې کړې
سیمهییزو سرچینو ویلي، طالبانو د غزني ولایت د ناور ولسوالۍ اړوند د برجګي په سیمه کې د کور په کور تلاشۍ وروسته څو تنه سخت ربړولي دي. د دوی په وینا، طالبانو له دغو کسانو څخه د یوه کس د بدن غوښه پرې کړې او هغه په ټپي حالت کې روغتون ته وړل شوی.
دغو سرچینو د جمعې په ورځ (د تلې ۷ مه) افغانستان انټرنشنل ته وویل، چې دغه کس محمد یونس مهري نومېږي او دنده یې د درملو جوړول دي.
سرچينې زياته کړې، چې طالبانو هغه سخت وهلی او څو پښتۍ يې ور ماتې کړې هم دي.
د دغو سرچینو په وینا، طالب جنګیالیو له ښاغلي مهري او نورو کلیوالو څخه غوښتي وو، چې هغوی ته وسلې او یا د وسلو بیه ورکړي؛ خو دوی نه وسلې درلودې او نه یې هم د وسلو د بیې په بدل کې پیسې درلودې.
ويل کېږي، چې دغه کليوال هيڅ پوځي مخینه نه لري او له پخواني حکومت سره يې کار هم نه دى کړى.
زمونږ د سرچینې په وینا، طالب جنګیالیو له څو ورځو راهیسې د برجګي سیمې په کلیو کې کور په کور تلاشي پیل کړې ده.
طالب سرچینو تر اوسه په دې اړه څه نه دي ویلي.
د دغې ډلې جنګیالیو تر دې وړاندې هم په بېلابېلو ښاري او کلیوالو سیمو کې کور په کور تلاشي کړې او په ډېرو سیمو کې یې له خلکو سره د زورزیاتي راپورونه هم ورکړل شوي دي.