د تهران د والي سیاسی او ټولنیز مرستیال د تهران په لویدیځ کې د دوه نیم میلیونه کډوالو شتون د دغه ولایت لپاره یوه ستره ننګونه وبلله. په ایران کې تر ټولو زیات کډوال افغانان دي او دوی په وار،وار د دغه هېواد د حکومت له ناوړه چلند څخه شکایت کړی دی.
عباس جوهري د یکشنبې په ورځ (د تلې ۹مه) د تهران د عامه کلتوري شورا په ۱۱مه سیمهییزه غونډه کې وویل، چې د کډوالو د شتون مسله په تېره بیا د پوهنې په ډګر کې پیسو ته اړتیا لري.
د راپورونو له مخې، په ایران کې افغان کډوال له ګڼو ستونزو سره مخ دي، له دغو ستونزو یوه هم د افغان کډوالو ماشومانو ته د زدهکړو ستونزه ده، چې د ښوونځیو د نوم لیکنې په برخه کې له خنډونو سره مخ دي.
د کډوالو د شتون بحث یو ځل بیا د ایران په پارلمان کې مطرح شو.
د ایران په پارلمان کې د خمیني شهر استازي ادعا وکړه، چې د ایران خلک د بهرنیانو له زیاتېدونکي شتون څخه ناخوښه دي او دا یو یرغل ګڼی.
محمدتقي نقدعلي په ایران کې د افغان کډوالو اوسېدو ته په اشارې سره وویل:« په ښارونو کې د بهرنیو وګړو بحثونه، په تېره بیا د پوهنې په ډګر کې د سیمې په امنیت باندې اغېز کړی دی.»
ښاغلي نقدعلي په دې اړه د ولسي جرګې له مشر څخه وضاحت غوښتی دی.
د ایران د کورنیو چارو وزارت د بهرنیو وګړو او کډوالو د چارو ادارې د شمېرو له مخې، په ایران کې څه باندې پنځه میلیونه افغان کډوال ژوند کوي.
