د طالبانو د ریس اولوزرا اقتصادي مرستیال ملابرادر د کابل شانګهای هوايي دهلیز د پرانیستې په مراسیمو کې د افغان ملي سوداګرو او شتمنو څخه غوښتنه وکړه چې په هرات د زلزله ځپلو سره مرسته وکړي.
نوموړی وايي، که د نړۍ هېوادونه له افغانستان سره همکاري وکړي، دوی به یې هرکلی وکړي.
د یک شنبې په ورځ د (تلې۱۶مه) د کابل شانګهای تر منځ د هوايي دهلیز د پرانیستنې په مراسیمو کې د طالبانو د ریاست الوزرا اقتصادي مرستیال ملا عبدالغني برادر وویل:«له افغان سوداګر څخه غوښتنه کوو چې د هرات د زلزله ځپلو سره مرسته وکړي. موږ د زلزلې سیمې ته پر وخت رسېدنه کړې. او پر وخت به سیمې ته مرستې ورسوو او تر خاورو لاندې د وژل شویو کسانو د راایستلو عملیات دوام لري.»
پر همدې مهال نوموړي پاکستان او ایران هیوادونو ته په اشاره او هلته د افغان کډوالو سره د روان ناوړه چلند په اړهوویل ، د پاکستان له لورې افغان کډوالو ته سپکاوی هیڅ افغان ته د منلو وړ نه دی.
«زموږ ګاونډیان دې زموږ سره ښه تعامل ولري، او که دوی موږ ته ستونزي جوړوي دا د دوی په ګټه نه دي بلکې دوی ته به زیان واوړي.»
د شنبې په ورځ د تلې په ۱۵مه د افغانستان شمال لوېدیځ د ۶،۳ درجې په کچه یوې زلزلې ولړزاوه. د امریکا د ځمکپیژندنې سروې ادارې ویلي چې د دې زلزلې مرکز د هرات ولایت د زنده جان ولسوالي وه.
د طبیعي پېښو پر وړاندې د مبارزې وزارت ویاند ملاجانان فایق نن په یوه خبري غونډه کې وویل چې د لومړنیو شمېرو له مخې په هرات کې د تېرې ورځې په زلزله کې څه باندې ۲ زره ۵۳ تنه وژل شوي او شاوخوا ۹ زره ۲۴۰ تنه ټپیان شوي دي.
د هغه په وينا، د دې زلزلې ډېرى قربانيان د هرات د زنده جان ولسوالۍ په ١٣ کليو کې دي.
ده وويل چې ١٣٢٠ کورونه ويجاړ شوي دي.
دا شمېرې وروستۍ نه دي او شېبه شېبه د مړو او ټپیانو شمېرې لوړيږي.
