د طالبانو د رییس الوزرا له دفتره په خپره شوې خبر پاڼه کې ویل شوي، چې د دغې ډلې د مشر ملا هبت الله اخوندزاده په امر یې د وزارتونو په کچه یو ګډ کمېسیون جوړ کړی، چې د کډوالو اوسنی وضعیت وڅېړي.
په خبر پاڼه کې راغلي، چې دغه کمېسیون لومړۍ غونډه د طالبانو د رییس الوزرا ملا محمد حسن اخوند په مشرۍ کړې او پکې په ګاونډیو هېوادونو کې د افغان کډوالو پر ستونزو، د بېرته راستنېدو پر وړاندې د خنډونو او په کور دننه د ستونزو په اړه خبرې اترې شوې دي.
د خبر پاڼې له مخې؛ په غونډه کې د ریاست الوزرا اداري مرستیال عبدالسلام حنفي ته دنده سپارل شوې ده، چې یاد کمېسیون ته طرزالعمل جوړ کړي.
په افغانستان کې وروسته له هغې د افغان کډوالو د بېرته راستنېدو مساله ګرمه شوه، چې د پاکستان حکومت اعلان وکړ، چې له دغه هېواده به ټول غیرقانوني کډوال وباسي.
په ورته وخت کې ایران هم اعلان کړی، چې دوی به غیرقانوني کډوال له خپلې خاورې وباسي.
دغه پرېکړې په سیمه ییزه او نړۍواله کچه له پراخ غبرګون سره مخ شوې، مګر تر اوسه د دواړو هېوادونو په دریځونو کې کوم بدلون نه دی راغلی.
د طالبانو یو شمېر چارواکو د افغان کډوال راویستل له طالبانو سره د جنګ په معنا یاد کړل او زیاته یې ده، چې افغان کډوالو له روسیې سره د جګړې پر مهال له پاکستان څخه دفاع کړې ده.
یادو غبرګونونو ته تر دا مهاله پاکستان ځواب نه دی ویلی، خو نن د پاکستان د سرپرست حکومت لومړی وزیر انوارالحق کاکړ ویلي، په پاکستان کې درې برخې کډوال اوسیږي او د افغانانو په ګډون هغه کډوال چې قانوني اسناد لري هغوی به له له پاکستانه نه ویستل کیږي.
نوموړی ویلي: «موږ د ۱،۸ میلیونه اسناد لرونکو افغان کډوالو د ویستلو په اړه هیڅ خبره هم نه ده کړې او ویل کیږي چې ټول افغانان باید له پاکستان څخه ویستل شي دا اوازه ده، موږ د اسناد لرونکو افغانانو سره هېڅ کار نه لرو.»
خو په ورته وخت کې یو شمېر د قانوني اسنادو لرونکي افغان کډوال شکایت کوي، چې پاکستاني پولیس یې ځوروي، کورونو ته یې ورننوځي او له دوی پېسې اخلي.
