د تخار د سرو زرو په یوه کان کې درې کان کندونکي مړه شوي او یو بل ټپی دی
په تخار کې د طالبانو ځايي چارواکي وايي، چې د دغه ولایت د سره زرو په یوه کان کې د کان د نړېدو له امله درې کان کندونکي مړه شوي او یو بل ټپي دی.
په تخار کې د طالبانو ځايي چارواکي وايي، چې د دغه ولایت د سره زرو په یوه کان کې د کان د نړېدو له امله درې کان کندونکي مړه شوي او یو بل ټپي دی.
د طالبانو د تخار د امنیه قوماندانۍ ویاند عبدالمبین صافي د یوې اعلامیې په خپرولو سره ویلي، چې نن چهارشنبه (د تلې ۱۹مه) د تخار ولایت د خواجه غار ولسوالۍ په حمور ساي کلي کې درې د سرو زرو کان کندونکي د کان د نړېدو له امله مړه شوې دي.
نوموړي دا نه دي ویلي، چې د سرو زرو کان د نړېدو علت خپلسرې او غېر مسلکي کندنه وه او که کومه بله پېښه رامنځته شوې ده.
بل خوا د تخار د ولایتي روغتون یوه ډاکتر افغانستان انټرنشنل ته ویلي، چې له دغې پېښې څخه ورته یو ټپي هم ور وړل شوی دی.
طالبانو په دې وروستیو کې د افغانستان ګڼ کانونه په قراردادونو ورکړي دي، د کانونو متخصصین بیا نیوکه کوي، چې په یادو کانونو کې اکثره کندونکي غیرمسلکي خلک دي، چې کوچنۍ تېروتنه یې د مرګ یا ټپي کېدو سبب کېدلی شي.
