وروسته له هغې چې په هرات کې د زلزلې له امله د مرګ ژوبلې خبرونه خپاره شول، په ننګرهار کې یو شمېر ځوانانو د مرستې راټولو درې ورځینی کمپاین پیل کړ، چې په ترڅ کې یې د نېږدې ۲،۹ میلیونه نغدي مرستې سربېره د یوولس لکو افغانیو په ارزښت درمل مرسته شوې ده.
د مرسته راټولونې د دغه کمپاین غړو افغانستان انټرنشنل ته وویل، چې په تېرو درېیو ورځو کې د ننګرهار د مرکز سربېره په بېلابېلو ولسوالیو کې مرسته راټوله کړې ده.
دوی زیاته کړه، چې په یادو مرستو کې ۲۳۵۱۹۰۱ افغانۍ، ۱۰۷۴۰۸ کلدراې، ۲۵۰۰ امریکايي ډالر او ۳۵۰ ایرو نغدي مرسته شوې ده.
د مرسته راټولوونکو په خبره، چې دوی د ۱۱ لکه افغانیو په ارزښت درمل هم راټول کړي او په زرګونه جوړه جامې، بوټونه، کمپلې او نور اړین توکي هم راټول شوي دي.
یادو ځوانانو زیاته کړه، چې دوی به سبا د دغو مرستو د رسولو په مېکانیزم یوه غونډه کوي او په اړه به یې تصمیم نیسي، چې کله او څه ډول دغه مرستې د هرات زلزله ځپلو ته ورسوي.
لا هم د افغانستان د پلازمینې کابل سربېره په ګڼو ولایاتو کې د مرستې راټولونې بهیرونه روان دي.
په هرات کې له زلزلې را وروسته یو شمېر نړۍوالو بنسټونو، سوداګرو، هېوادونو او مرستندویه ادارو د هرات له زلزله ځپلو سره د مرستې اعلانونه کړي دي.
