د روان نړۍوال جام په ترڅ کې د افغانستان د کرېکټ ملي لوبډلې خپله دویمه لوبه هند ته وبایلله. د افغانستان او هند دا سیالي د کوربه هېواد د پلازمېنې نوي ډېلي په ارون جټلي لوبغالي کې د افغان لوبغاړو په توپوهنه پیل شوه.
افغان لوبغاړو د ټولو ۵۰ اورونو په لوبولو او د اتو لوبغاړو په سوځېدو سره ۲۷۳ منډې هدف وټاکه.
د افغانستان کرېکټ بورډ وايي، په دې سیالۍ کې لوبډلمشر حشمت الله شهیدي ۸۰، عظمت الله عمرزي ۶۲، ابراهیم ځدراڼ ۲۲، رحمن الله ګربز ۲۱ او محمد نبي ۱۹ منډې جوړې کړې.
دا په اوسني نړۍوال جام کې د افغانستان دویمه لوبه وه.
د هند د توپوهنې په نوبت کې یادې لوبډلې د افغانستان له خوا د ۲۷۳ منډو هدف د خپلو ۲ لوبغاړو په اوټ کېدو سره پوره کړ او دغه سیالي یې په خپلې ګټې تمامه کړه.
افغانستان به راتلونکې یکشنبه خپله درېیمه لوبه په همدغې لوبغالي کې له انګلستان سره کوي.
افغان لوبډلې تر دې مخکې او تېره شنبه له بنګله دېش سره لوبه کې ماته خوړلې وه.
د کرېکټ دا نړۍوال جام د اکټوبر په پنځمه په هند کې پیل شو او د نومبر تر ۱۹ به روان وي.
په سږني جام کې د افغانستان، اسټرالیا، بنګله دېش، انګلینډ، هند، هالنډ، نیوزیلنډ، پاکستان، سوېلي افریقا او سریلانکا ملي لوبډلې ګډون لري.
