واشنګټن پوسټ: امریکا او قطر موافقه کړې، چې د ایران شپږ میلیارده ډالر ازاد نه کړي
واشنګټن پوسټ راپور ورکړی، چې امریکا او قطر یوې هوکړې ته رسېدلي، چې له مخې یې د ایران شپږ میلیارده ډالرو شتمنیو ته د لاسرسي مخنیوی وکړي.
واشنګټن پوسټ راپور ورکړی، چې امریکا او قطر یوې هوکړې ته رسېدلي، چې له مخې یې د ایران شپږ میلیارده ډالرو شتمنیو ته د لاسرسي مخنیوی وکړي.
دې ورځپاڼې ته دوو سرچينو ويلي، چې د امريکا د ماليې وزارت مرستيال دغه موضوع د ولسي جرګې د ډېموکراټ ګوند له استازو سره مطرح کړې ده.
په راپور کې راغلي، چې دا پرېکړه په اسراییل د حماس د حملې په پام کې نيولو سره نيول شوې ده.
د سي بي ایس نیوز یوه لوړپوړي خبریال هم په یوه ټویټ کې لیکلي، چې دې شبکې ته خبر ورکړل شوی چې امریکا له قطر سره «په پټه یو تفاهم» ته رسیدلې؛ ترڅو د واشنګټن او تهران ترمنځ د شپږ ملیارده ډالره د بندیانو د تبادلې پیسې چې قطر ته لېږدول شوې وې، ازادې نه کړي.
د ایران شپږ میلیارده شتمنیو ته د لاسرسي د مخنیوي پرېکړه څو اونۍ وروسته له هغې کیږي، چې د امریکا او ایران حکومتونو په سیمه کې د دښمنۍ د کمولو په هدف د دې پیسو د خلاصون او د بندیانو د تبادلې په اړه موافقه اعلان کړه.
دغه توافق په تېرو اونیو کې د ایران د اسلامي جمهوریت د مخالفینو تر منځ ډېرې نیوکې راپارولې وې.
واشنګټن پوسټ مخکې راپور ورکړی و، چې امریکايي چارواکو ویلي ایران حماس ته د روزنې فرصتونه او وسلې ورکړي، خو داسې شواهد نه شته چې ثابته کړي ایران دې په برید کې مستقیم رول لوبولی وي.
