د طالبانو د کانونو او پټرولیم وزیر د پنج شنبې په ورځ د (تلې ۲۰مه) د پروان ولایت د جبل السراج د سيمټو پروژي د قرارداد لاسلیک پر مهال وویل، یاده پروژه د دوه سوه میلیونه ډالرو په ارزښت ده او شاوخوا ۵۰۰۰ کسانو ته به پکې د کار کولو زمینه برابره شي.
د طالبانو د کانونو او پټرولیم وزیر شهاب الدین دلاور وویل، د جبل سراج ولسوالۍ د سيمټو له پروژې څخه به په کال کې یو نیم میلیون ټنه سيمټ تولید شي.
همدارنګه نوموړي د یادې پروژې قرارداد د لاسلیک په مراسمو کې وويل: « د سرپل په قشقري د تېلو د استخراج لپاره د شاوخوا پنځه زره مربع کيلومتره مساحت تړون شوى، چې له دې لارې به هره ورځ کې زر ټنه تېل را اېستل کیږي.»
ښاغلي دلاور وويل، په پنجشير ولايت کې د زمردو کانونه د دغه ولايت خلکو ته په داوطلبانه ډول وړاندې کېږي، چې لس سلنه ګټه يې د دولت او ٩٠ سلنه ګټه يي د قرارداد کوونکو ده.
دا په داسې حال کې ده چې طالبانو تیره ورځ په بلخ ولایت کې د قوشتېپي کانال لومړی برخه بشپړه او ګټې اخیستنې ته وسپارله او د یاد کانال د دویمې برخې کارونه یې پیل کړل.
طالبانو تردې وړاندې هم د افغانستان یو شمېر طبیعې کانونه په قرارداد ورکړي و.
پر افغانستان د طالبانو تر واکمنېدو وروسته چین لېوالتیا ښودلې چې د افغانستان په کانونو کې پانګونه وکړي.
طالبانو د تخار ولایت د سرو زرو د کان قرارداد له چینایانو سره د ۳۱۰ میلیونه ډالر په ارزښت لاسلیک کړی دی.
د دې تر څنګ طالبانو د افغانستان په لوګر کې د مس عینک کان، د غور سرب او جستو کان، د غوریان د اوسپنې کان او یو شمېر نور سیمو کانونه په قرارداد ورکړي دي.
طالبان وايي، غواړي چې د افغانستان اقتصادي اړتیا د افغانستان له کورني تولید او طبعې زېرمو څخه پوره کړي.
