د پښتون ژغورنې غورځنګ په خپلې اېکس پاڼه لیکلي، چې د دغه غورځنګ مرکزي غړی فرمان اختر د واڼه پولیسو نیولی دی. د دغه غورځنګ په وینا، فرمان اختر غوښتل چې د میرانشاه پرېس کلپ مخې احتجاج ته د ګډون لپاره ورشي، چې په واڼه کې د پولیسو لهخوا ونیول شو.
لاتراوسه د پاکستان پولیسو د فرمان اختر د نیونې په اړه څه نه دي ویلي.
د پښتون ژغورنې غورځنګ مشر منظور پښتین تېره ورځ په اېکس پاڼه په خپل لیکلي پیغام په شمالي وزیرستان کې د پولیسو لهخوا د دغه غورځنګ د غړیو زکیم خان، ګېلهمن پښتین او نورالله ترین د «غیرانساني او ناقانونه نیولو» پر وړاندې یوه غونډه رابللې وه.
تر دې وړاندې هم د پاکستان د پولیسو لهخوا د پښتون ژغورنې غورځنګ د غړیو ترځنګ ځینې نور مشران هم نیول شوي وو او د بند یوه موده یې هم تېره کړې ده.
