ټاکل شوې وه، چې په برلین کې د طالبانو په ګډون یوه غونډه جوړه شي، د دې غوڼډې تنظیموونکو افغانستان انټرنشنل ته وویل، چې دا غونډه ځنډول شوې ده. په ورته وخت کې سرچینو ویلي، چې جرمني طالب چارواکو ته د وېزو له ورکولو ډډه کړې ده.
د جرمني د وسټفالن مسیحي ټولنه چې د دې غونډې یو له تنظیم کوونکو څخه وه، افغانستان انټرنشنل ته یې د دې غوڼډې ځنډېدل تایید کړل. خو دغې موسسې د غونډې د ځنډېدو د لامل په اړه له څه ویلو ډډه وکړه.
سرچینو افغانستان انټرنشنل ته ویلي؛ تمه وه چې په دې غونډه کې به د سیاسي ډلو د لوړ پوړو مشرانو او د طالبانو د استازو په کچه افغانان ګډون وکړي.
د سرچينې د معلوماتو له مخې؛ په پام کې وه چې په دې غونډه کې د طالبانو د بهرنيو چارو وزير اميرخان متقي او د دې ډلې پنځه نور چارواکي هم ګډون وکړي.
د جرمني په حکومت کې یوې سرچینې افغانستان انټرنشنل ته ویلي، چې جرمني طالبانو ته د وېزو له ورکولو ډډه کړې ده.
د جرمني حکومت په دې اړه د افغانستان انټرنشنل پوښتنو ته ځواب نه دی ویلی.
تر دې مخکې د افغانستان د بشري حقونو او د ښځو د حقونو یو شمېر فعالانو د جرمني بهرنیو چارو او کورنیو چارو وزیرانو او همدارنګه د جرمني د پارلمان غړو ته یو لیک استولی و او په دې غونډه کې یې د ګډون په موخه طالبانو ته د وېزو د ورکولو د مخنیوي غوښتنه کړې وه.
د افغان- جرمن ټولنې چې د دې غونډې یو له بل تنظیم کوونکو څخه دی، په یوه اعلامیه کې لیکلي چې د برلین غونډه بلې نېټې ته ځنډول شوې ده.
دې ټولنې زیاته کړه چې غونډه د «تخنیکي دلایلو» له امله وځنډول شوه.
د افغان-جرمن ټولنې د برلین د غونډې ګډونوالو ته وویل، چې د غونډې د نوې نېټې په اړه به دوی ته معلومات ورکړي.
تر اوسه طالبانو د برلین غوڼډې په اړه څه نه دي ویلي.
د ننګرهار د وچې میوې اتحادې سرچېنو ویلي، چې دغه مېرمنې د امربالمعروف له خوا له کاره منع شوې دي.
د ننګرهار د وچې میوې اتحادې یوې سرچینې نن سې شنبه (د تلې په ۲۴مه ) افغانستان انټرنشل ـ پښتو ته وویل چې طالبانو نن سهار هغه میرمنې له کاره منع کړې، چې له کلونه راهیسې د جلغوزو د غوټو د سپړلو په پروسه کې پر لاس مزدورۍ اخته وې.
دغو مېرمنو چې شمېر یې څلور سوه تنو ته رسیږي د خپلې کورنۍ د خراب اقتصادي وضعیت له امله لاس مزدوري کوله.
ځايي سرچینې وویل؛ یوه مېرمنه چې د خپل خاوند سره د جلغوزو د غوټو د سپړلو ځای ته د کار لپاره راغلې وه، طالب وسلوال یې مخنوی وکړ، چې میرمنې له دې وروسته نه شي کولی کار وکړي.
د ننګرهار له یو شمېر ولسوالیو څخه راټول شوي جلغوزي د جلال اباد ښار په څنډه کې د هډې فارم په نامه سیمه کې په يوه تش ډاګ اچول کېږي؛ څو غوټې يې د لمر په وسيله ښې وچې شي او جلغوزي په اسانۍ ترې را ویستل شي.
په دې سره سلګونه بېوزلو ښځو ته د کار موقع په لاس ورځي، چې د یو څو پیسو په پېدا کولو سره د ژمي لپاره د سون او خوراکي توکي برابر کړي.
ځايي سرچینې وايي؛ د طالبانو دا کار به د ګڼو بېوزلو ښځو ژوند لاپسې نور هم سخت کړي.
په ننګرهار کې طالبانو تر اوسه په رسمي ډول په دې اړه څه نه دي ویلي.
په افغانستان کې د طالبانو واک ته له رسېدو سره دغې ډلې د ښځو او نجونو له زده کړو او کار کولو څخه منع کړي دي.
د طالبانو دغه محدویتونو ډېری افغانان اړ کړي دي، چې له افغانستان څخه وځي او په بهرنیو هېوادونو د کډوالۍ ژوند ته مخ کړي.
په ورته وخت کې په پاکستان او ایران کې افغان کډوال له ګڼو ستونزو سره مخ دي، دواړو هېوادونو اعلان کړی، چې ناقانونه کډوال به وباسي او هېڅوک نه شي کولی، چې پرته له اسنادو په دغو هېوادونو کې ژوند وکړي.
