د اسټرالیا کرېکټ ملي لوبډلې د هند په بنګلور کې د پنځوسو اورونو په لوبولو سره پاکستانۍ لوبډلې ته ۳۶۸ منډې هدف وټاکه. د کرېکټ نړیوال جام دا ۱۸ سیالي د بنګلور ښار په چنا سوامي لوبغالي کې د اسټرالیا په توپ وهلو پیل شوه.
اسټرالیا د نهو لوبغاړو په سوځېدو او د ټولو اورونو په لوبولو سره ۳۶۷ منډې وکړې.
د اسټرالیا لومړنیو دوو لوبغاړو ډیویډ وارنر ۱۶۳ او میچل مارش ۱۲۱ منډې جوړې کړې.
په دې لوبه کې د پاکستان د ملي لوبډلې شاهین اپریدي پنځه او حارث سهیل ۳ لوبغاړي وسوځول.
د کرېکټ نړیوال جام د اکټوبر پر پنځمه په هند کې پیل شو او د نومبر تر ۱۹ به روان وي.
په سږني جام کې د افغانستان، اسټرالیا، بنګله دېش، انګلنډ، هند، هالنډ، نيوزیلنډ، پاکستان، سوېلي افریقا او سریلانکا ملي لوبډلې ګډون لري.
د پښتونخوا په مرکز پېښور کې پولیسو د دې صوبې د تعلیم پخوانی وزیر او د تحریک انصاف ګوند یو مشر کامران بنګښ ونیو. پولیس وايي، نوموړی یې څمکنیو کې په خپل کور کې نیولی او بیا یې ځايي تاڼې ته وړی دی.
د جیو نیوز د پنجشنبې ورځې د راپور له مخې، کامران بنګش له څمکنۍ تاڼې وروسته نامالوم ځای ته لېږدول شوی دی.
پولیسو دا نه دي ویلي چې کامران بنګښ یې ولې نیولی دی.
د نوموړي خلاف د مۍ د نهمې او لسمې د پېښو اړوند دوسیې په تاڼو کې درج شوې وې، خو په ځینې کېسونو کې یې له نیول کېدو مخکې ضمانت شوی و.
پاکستاني رسنیو خبر ورکړی، چې د پښتونخوا په شمالي وزیرستان کې د تالاشۍ پر پوسته برید شوی، چې له امله یې درې پاکستاني پوځیان وژل شوي او همدا راز په پېښور کې یو پولیس افسر په یوه هدفي برید کې وژل شوی دی.
جیونیوز د امنیتي سرچینو په حواله ویلي، چې نن «د تلې ۲۷مه» سهار د شمالي وزیرستان په ګړیوم سیمه کې د پاکستاني پوځیانو د تالاشۍ پر پوسته وسلوالو برید کړی، چې له امله یې درې پوځیان وژل شوي دي.
خبر زیاتوي، چې په پېښه کې یو پوځي ټپي شوی هم دی، چې د درملنې لپاره پوځي روغتون ته انتقال شوی دی.
که څه هم پاکستاني طالبانو په رسمي ډول د دغې پېښې په اړه څه نه دي ویلي، خو په ټیلګرام کې پاکستاني طالبانو ته نېږدې کانالونو منلې، چې دغه برید د دوی ملګرو کړی دی.
دغو سرچینو ویلي، چې په ګړیوم کې یې شپږ پاکستاني پوځیان وژلي او دوه نور یې ټپیان کړي دي.
همدا راز د یوه بل خبر له مخې، پرون د پېښور په پیر بالا چوک کې د رېګي پوستې پر یوه پولیس افسر د ناپېژاندو وسلوالو له خوا برید شوی، چې له امله یې نوموړی وژل شوی او دوه ولسي وګړي ټپیان شوي دي.
د پېښور پولیسو رسنیو ته ویلي، چې تر اوسه دا نه ده معلومه چې پر نوموړي پولیس افسر چا ډزې کړې دي؟
تر دا مهاله د دغې پېښې مسوولیت کومې وسلوالې ډلې نه دی منلی.
په افغانستان کې د طالبانو له بیا واکمنېدو سره سم په پاکستان کې بې سارې ناامني رامنځته شوې، پاکستاني چارواکو په وار – وار ادعا کړې، چې په دا ډول پېښو کې یو شمېر افغانان هم لاس لري.
خو طالبانو بیا دا ډول ادعاوې رد کړې او د پاکستان ناامني یې د هغوی د امنیتي ادارو ناکامي بللې ده.
د کډوالۍ نړۍواله اداره «ای او ایم» وايي، چې د اکټوبر میاشتې په لومړیو پنځلسو ورځو کې له پاکستان څخه ۳۷۳۱۷ افغان کډوال بېرته افغانستان ته ستانه شوي دي.
دغه اداره په خپل نوي راپور کې وايي، چې له دوی سره د ثبت شویو ارقامو له مخې ۲۶۸۹۶ تنه د تورخم او ۱۰۴۲۱ تنه یې د سپین بولدک له لارې افغانستان ته ستانه شوي دي.
په ورته وخت کې د طالبانو د کډوالو او بېرته راستنېدونکو چارو وزارت پرون پر خپله اېکس پاڼه لیکلي، چې د تورخم او اسلام کلا د سرحدي امریتونو د راپورونو له مخې د «تلې تر ۲۹مې» ۵۹۷۱ کډوال هېواد ته ستانه شوي دي.
راپور د اسلام کلا د سرحدي امریت په حواله لیکلي، د ۳۲۴۳ جبري او په خپله خوښه راستنو شویو له ډلې ۳۲۴ اړمن او زیان منونکي کسان له تشخیص وروسته د مرستو د ترلاسه کولو په موخه د کډوالۍ نړۍوال سازمان ته ورپېژندل شوي، چې د خوراکي توکو او نورو مرستو څخه برخمن شي.
دغه وزارت لیکلي، چې د تورخم له لارې ۴۸۶ کورنۍ چې ټولټال ۲۷۲۸ تنه کېږي، «د تلې په ۲۶مه» هېواد ته ستنې شوې دي.
همداراز د کډوالۍ نړۍواله اداره وايي، چې د اکټوبر تر ۱۵مې نېټې ۶۱۴ افغان کډوال چې قانوني اسناد یې نه لرل له پاکستان څخه افغانستان ته شړل شوي دي.
په پاکستان کې له افغان کډوالو سره بد چلند دغه کډوال دې ته اړ اېستي، چې هره ورځ یې د ستنېدو په شمېر کې زیاتوالی راشي.
له بلې خوا د پاکستان لهخوا د ناقانونه کډوالو د ضرب الاجل پای ته رسېدو ته د ګوتو په شمېر ورځې پاتې دي او دغه کورنۍ د زندان له وېرې په بېړه غواړي له دغه هېواد ووځي.
په ورته وخت کې د طالبانو له خوا د ننګرهار ولایت په لعلپورې ولسوالۍ کې د جبري راستنېدونکو کډوالو لپاره د یوه لنډمهاله پنډغالي د جوړېدو چارې د تلې په ۲۶مه پیل شوې دي.
د طالبانو د کډوالو چارو وزارت مسلکي معین او په جبري توګه د راستنېدونکو د وضعیت د ارزونې د کمېسیون د لنډمهاله مېشتېدنې کمېټې مشر عبدالرحمن راشد د دغه پنډغالي د جوړولو د پرانیستې پرمهال وویل، چې په دغه لنډمهاله پنډغالي کې په یوه وخت ۵۰۰ کورنۍ ځایېدلای شي.
بل خوا د تېرې سې شنبې په ورځ د ملګرو ملتونو کارپوهانو پر پاکستان غږ کړی، چې په سمدستي ډول دې له دغه هېواده د ۱،۴ میلیونو افغان کډوالو د اېستلو پروسه ودروي.
دغې ډلې له افغان کډوالو سره د پاکستان د حکومت پر چلند اندېښنه څرګنده کړې ده.
دغه کارپوهانو ویلي، چې د پاکستان د حکومت دا ډول اقدامات به ۱،۴ میلیونه وګړي اغېزمن کړي، چې له ډلې یې ګڼ شمېر د بشري حقونو د جدي اندېښنو له امله پاکستان ته کډوال شوي دي.
د کارپوهانو دغه ډله په پاکستان کې د افغان کډوالو، مېرمنو، ماشومانو او نورو اقشارو د بېرته ستنېدو د ګواښ په اړه اندېښنه ښيي او زیاته کړې یې ده، چې دوی په خپل هېواد کې له جدي بشري زیان سره مخ کېدونکي دي.
د ملګرو ملتونو د کارپوهانو ډله زیاتوي، چې جبري شړل او ښکاره شکنجې د بشري حقونو سره په ټکر او د موجوده کنوانسینونو د نه رعایت په معنا ده: “پاکستان د دغو کنوانسیونونو غړی هېواد دی او باید عملي یې کړي”.
خو د پاکستان د بهرنیو چارو سرپرست وزیر جلیل عباس جیلاني د یکشنبې په ورځ «د تلې په ۲۳مه» د خبري کنفرانس پر مهال د افغان کډوالو په اړه وویل:”زه بیا غواړم ووایم هغه کسان چې قانوني اسناد ولري د هغوی لپاره په پاکستان کې د اوسېدو هېڅ ستونزه نه شته. هغوی کولای شي چې په پاکستان کې ژوند وکړي”.
پاکستان د افغان کډوالو د ویستلو لپاره د روانې میلادي میاشتې تر وروستۍ نېټې د وتلو ضرب الاجل ټاکلی دی.
د پاکستان له لوري د افغان کډوالو سره د زور زیاتي په اړه طالبانو هم غبرګون ښودلی او یو شمېر لوړ پوړو طالب چارواکو پاکستانی لوري د افغان کډوالو سره د روان چلند د نه زغمولو یاد کړ.
د افغانستان د تکواندو فدراسیون اعلان وکړ چې د پاراتکواندو ملي لوبډله نن له غرمې وروسته له دریو لوبغاړو او یوه روزونکي سره د چین هانګژو ته روانه شوه.
د افغانستان لوبډله به د منفي ۵۸، منفي ۶۳ او منفي ۸۰ کيلوګرامو وزن سره په هانګژو کې د ۲۰۲۳میلادي کال په پارا اسيايي سياليو کې ګډون وکړي. دا لوبې د اکټوبر د ۲۲مې او ۲۸مې نېټې ترمنځ کیږي.
په دې سفر کې بادام ګل سروري د روزونکي په توګه او جاوید صدیقي د افغانستان د پارالمپیک د استازي په توګه له لوبډلې سره ملګري دي.
د هانګژو پارا اسيايي لوبو د تکواندو سيالۍ به د اکتوبر له۲۳مې نېټې پيل شي.
د پاکستان یو وتلی سیاستوال نواز شریف درې ځلې لومړی وزیر شوی، خو د فساد د تورونو او له پوځ سره د ډغرو له امله یې یو ځل هم خپله دوره نه ده بشپړه کړې. پخپله خوښه جلاوطن شریف راتلونکې شنبه پاکستان ته ستنېږي او راتلونکو ټاکنو کې لوبېدو ته تیارېږي.
۷۳ کلن نواز شریف له ۱۹۹۰ تر ۹۳، بیا له ۱۹۹۷ تر ۹۹ او بیا هم له ۲۰۱۳ تر ۱۷ لومړی وزیر و، خو اول ځل د پوځ ملاتړي ولسمشر، بیا کودتا او دریم وار هم د محکمې له خوا بې واکه شو.
نواز شریف صنعي کورنۍ کې وزېږېد، د پولادو تولید سره یې پیسې پیدا او د اتفاق ګروف په نوم د کورنۍ شرکت یې پراخ کړ.
نوموړی د ۱۹۷۰ کلونو په وروستیو کې سیاست ته لاړ او پر ۱۹۸۱ کال د پنجاب صوبايي مالي وزیر شو.
نواز شریف له جنرالانو سره د نږدې اړیکو په لرلرو مشهور و، دوی یې د پنجاب له حیرانوونکې اقتصادي ودې اغېزمن کړي وو. د پوځي ډیکټاټور ضیاالحق په لاس روزل شوی و. د جنرالانو په ملاتړ پر ۱۹۸۵ کال د پاکستان د ډېر وګړې او پرمختللې صوبې پنجاب سروزیر شو.
پر ۱۹۹۰ کال ټولټاکنو کې اول ځل د پاکستان لومړی وزیر او د دغه هېواد د لومړنۍ وزیر اعظمې بې نظیر بوټو ځای ناستی شو، چې د وخت ولسمشر یې حکومت د بډو او فساد د تورونو له امله ړنګ کړی و.
پر ۱۹۹۳ کال نواز شریف له ولسمشر سره دوښمني پیل کړه او هغه یې هم حکومت د خېلپالنې او فساد په تور ختم کړ.
سترې محکمې د نواز شریف حاکمیت بېرته واکمن کړ، خو ښاغلی شریف او ولسمشر پخلاینه کې پاتې راغلل او دواړو استعفا وکړه.
پر ۱۹۹۷ کال نواز شریف بیا د مسلم لیګ نواز ګوند په مشرۍ ټاکنې وګټلې او دویم ځل لومړی وزیر شو.
د نوموړي په دغه واکمنۍ کې پاکستان د ۱۹۹۸ کال مۍ کې اول ځل اټومي ازموینه وکړه، دا ګام د دغه هېواد سخت سیال هند ته ځواب و چې څو ورځې مخکې یې دوه اټومي ازموینې کړې وې.
د شریف په دغه لومړي وزارت کې هند او پاکستان د ۱۹۹ کال له مۍ تر جولای د لانجمن کشمیر په کارګل کې جګړه وکړه.
نواز شریف د ۱۹۹۹ کال وروستیو کې د پوځ لوی درستیز پروېز مشرف سره ښکېل شو او هغه هم د کودتا له لارې بې واکه کړ. وروسته نواز شریف پر عمر بند محکوم شو، خو د سعودي په منځګړتوب ریاض ته جلاوطن شو. هغه پر ۲۰۰۷ کال پاکستان ته ستون شو.
نواز شریف د ۲۰۱۳ کال ټولټاکنو کې د دغه هېواد د پخواني کرېکټ اتل عمران خان سره په سیالۍ کې برلاسی او دریم وار لومړی وزیر شو.
نواز شریف له هند سره د اړیکو عادي کولو هڅه وکړه، پر ۲۰۱۴ کال یې ور سره سوداګریزې خبرې وکړې. ور پسې کال د هند لومړی وزیر نرېندر مودي د پاکستان لاهور ښار ته لاړ او له ښاغلي شریف سره یې ولیدل.
پر ۲۰۱۷ کال د پاناما اسنادو اړوند د فساد دوسیو په پلټنو پسې د محکمې په حکم سره له واک لرې شو.
د ۲۰۱۸ کال جولای کې د پاکستان فساد ضد محکمې نوموړی د اختلاس له امله پر لس کلن بند محکوم کړ.
د ۲۰۱۸ کال په ډیسمبر کې نواز شریف د فساد اړوند بله دوسیه کې هم مجرم وبلل او پر اوه کاله بند محکوم او وروسته د ټول عمر لپاره له سیاست بې برخې اعلان شو.
هغه دا ټول تورونه رد کړل او ویې ویل چې سیاسي انګېزه لري.
نواز شریف د ۲۰۱۹ کال اکتوبر کې د طبي اسنادو وړاندې کولو له مخې خوشی شو او څو اونۍ وروسته لندن ته وکوچېد او له دغه ځای په سیاست کې ښکېل پاتې شو.
نواز شریف راتلونکې شنبه د اکتوبر پر ۲۱ پاکستان ته ستنېدل او راتلونکو ټاکنو کې د مسلم لیګ په مشرۍ لوبېدل غواړي.
تېره میاشت د ښاغلي شریف او د پاکستان د څو نورو لومړیو وزیرانو اړوند د فساد یوه دوسیه بېرته را ژوندۍ شوه، خو وکیل یې امجد خان خان وايي، چې د اسلام اباد سترې محکمې د هغه د خوندیتوب ضمانت منظور کړی دی.