د پاکستان پخوانی لومړی وزیر نوازشریف له اسلام اباد وروسته د ده لپاره په جوړه شوې هرکلي غونډه کې د ګډون لپاره لاهور ته لاړ. نواز شریف نن په بریتانیا کې له څلور کلنې جلاوطنۍ وروسته اول اسلام اباد ته لاړ چې قانوني سندونه لاسلیک کړي.
په اسلام اباد هوايي ډګر کې د اسحاق ډار او اعظم نذیر تارړ په ګډون د دغه ګوند مهم مشران د نوموړي هرکلی وکړ.
نواز شریف د خپل ګوند له قانوني ټیم سره تر مشورې وروسته په ایون فیلډ او العزیزیه دوسیو کې د سزا خلاف د استناف غوښتنې ژوندي کولو درخواست لاسلیک کړ.
نوموړی په اسلام اباد هوايي ډګر کې تر دوو ګړیو تېرولو وروسته لاهور ته په الوتکه کې لاړ چې د ده په ویاړ د هرکلي غونډه کې ګډون وکړي.
د مسلم لیګ مشران وايي، چې قضايی ادارې د نواز شریف د نه نیولو ډاډ ور کړی دی.
خو له دې سره سره د پاکستان احتساب محکمې د توشه خانې دوسیه کې د نوموړي د نیولو وخت دوه ورځې ځنډولی دی.
مالومه نه ده چې تر دوو ورځو وروسته به له نواز شریف سره څه کېږي.
د چین ولسمشر وايي، بېجینګ له اسلام اباد سره همکاري زیاتول او نږېدوالي ته مایل دی، خو په دغه هېواد کې د چینايي ادارو او کارمنانو امنیت او خوندیتوب تضیمېندل هم غواړي. د چین د بهرنیو چارو وزارت د اعلامیې له مخې شي جنپینګ دا خبره وړمه ورځ د پاکستان له لومړي وزیر سره په لیدنه کې کړې.
چین د پاکستان نږدې ملګری او پانګوال دی، خو په وروستیو کلونو کې بېلتونپالو او اسلامپالو وسلوالو پر چینايي پروژو بریدونه کړي او د دغه هېواد وګړي یې وژلي دي.
د چین ولسمشر شي جنپینګ د پنجشنبې په ماښام د پاکستان سرپرست لومړي وزیر سره – چې لار او کمربند غونډه کې د ګډون لپاره چین ته تللی- لیدلي دي.
شي جنپینګ په دغه لیدنه کې انوارالحق کاکړ ویلي، چې دواړه هېوادونه بايد د د اقتصادي دهلېز پرمختللې نسخه تعقیب کړي، صنعتي پارکونو، د کرنې او کانونو، نوېدونکې انرژۍ او د ټرانسپورټ د سترو پروژو د ژر پلي کېدو په برخو کې همکارۍ زیاته کړي.
خو په ورته مهال یې په پاکستان کې د چینايي ګټو د امنیت خوندي کولو غوښتنه هم وکړه: «موږ هیله لرو چې پاکستانی لوری به په پاکستان کې د چینايي بنسټونو او کسانو د خوندیتوب ضمانت هم وکړي.»
د پاکستان سرپرست لومړي وزیر انوارالحق کاکړ د چارشنبې په ورځ وویل، چې دغه هېواد د سيپک پروژې له مخې د ۲۵ میلیارد ډالرو په ارزښت له ۵۰ ډېر پروژې بشپړې کړې ذي.
سیپیک د چین د بي ار ای اړوند پروژه ده چې پاکستان ته پکې د سړک، پټلۍ او نورو بېخ بنسټونو د پراختیا لپاره ۶۵ میلیارد ډالر ور کړل شوي دي.
د پاکستان روان صورت حال د باشعوره عوامو لپاره د انتها تر حده تشويشناک دی او هېڅ دليل او يقين نشته چې څوک به پرې چاله دا تسلي ورکړي چې د ملک سياسي، اقتصادي، معاشي حالت به ښه شي.
د دې بنيادي وجوهات دا دي چې جمهوريت خپلې سياسي فېصلې نشي کولې-- پارلمان"" پتلی تماشه""ده. په هرچا د کرپشن دعوې دي.
ټولې سياسي ډلې هېڅ لايحه عمل نه لري. د اقتدار په رسه کشۍ کې د مهنګايۍ غوندې طوفان څوک نه ويني او د قحط يو بد صورت حال سره ولسونه مخ دي.
پارلمان او عدليه په ښکاره د مقابلې په حالت پاتې شوي دي. پوځ د غېر جانبدارۍ خبره کوي خو له تېرو انتخاباتو پس پرده ټول ډايرکشن د مقتدره ادارو وو او اوس خو د ساونډ پروف کمرو دننه د سياستونو او مخصوص صحافيانو تجزيو کې چې کومې ګواهۍ راځي نو دا په جمهوريت، سياست او پارلمان کې د پوځ او ټولو خفيه ادارو بيخي بالادستي ښيي چې د بوډا پاکستان په ټول تاريخ کې له شروع راهیسې شوي دي.
د پاکستان څلور ښکاره مارشلا دورونه او د جمهوريت په بېک ګراونډ کی هم د پوځ حکم هر څه ښکاره دی. اوس که مقتدره ادارې لکه سول او پوځي اسټيبلشمنټ په سياست کې د غېر جانبدارۍ خبره کوي خو هر خاص و عام دا دليل په هېڅ صورت نه مني.
بل خوا د پاکستان عدليه له خوا د جانبدارۍ داسې فېصلې شوې دي چې سياسي معاشي بحرانونه یې راپېدا کړي دي.
دا موجوده چې کوم حالت روان دی او يا د دې حالاتو په نتيجه کې نور څه راځی هېڅ ښه نتيجه نه ورکوی او نه څوک عوام قايل کولی شی چې دا بحرانونه به حل شي.
دا بحرانونه تر هغه نه حل کيږي چې سياستونه پاک نشی او کرپټ قوتونه له منځه ونه وځي. دا څوک چې د غېر جانبدارۍ په جامه کې د جانبدرارۍ رول ادا کوي دا بيخي د منځه يوسي.
پارلماني سياست د پوځ او د مقتدره ادارو د سکنجې نه ووځي. جمهوريت په صحيح معنو د خانداني سياستونو نه لاندې عامو باشعوره نظرياتي خلکو ته راشي. مذهب او رياست ځان ځان ته جدا شي. د ګاونډیو ملکونو په جنګونو کې د لويو طاقتونو د کرایې سپايتوب ختم شي. ادارې خپلو خپلو کارونو کې خود مختاره پرېښودی شي.
د پاکستان ټولو قومونو ته په خپلو وسايلو خپل اختيار ورکړ شي. د قومونو د ژبو او د ټولو بنيادي انساني حقونه ومنل شي. د پردو جنګونو لپاره خپل قامي اهداف قربان نه کړي. ټول کرپټ قوتونه له منځه يوسي او کومه سرمايه چې بهر ته منتقل شوې ده دا واپس راوړي.
په سياسي ډلو د پارلمان نه بهر په زوره له فېصلو منلو نه ډډه وشي او دا موجوده چې کومې ډرامې روانې دي دا پروډکشن نور بند کړی شي.
که مونږ د خپلو ستونزو او په موجوده بحرانونو کې د پاکستان لويو اداروته وګورو د دوی رسه کشۍ په نظر کې ولرو نو دا ادارې به داسې تشريح کوو.
جمهوريت
د پاکستان جمهو ريت د صنعتکارو، جاګيردارو او سرمايه دارو شريک جاګير دی. د شاملاتو په جنګ کې د کرایې خلک مري او د سرمایې زور جمهوريت هم کرپټ کړی دی.
عدليه
عدليه د زورورو تحفظ د قانون له کتابه کوي. پوځی کودتا ته "نظريه ضرورت" وايي حالانکې د پاکستان نظريه نشته او ضروريات یې ډېر دي. عدليه د جانبدارۍ په فیصلو کې خپل ميزان هم متنازعه کړو.
پوځ
پوځ د جنګ علامت دی خو چونکې جنګ نشته نو په بلوچستان او پښتونخوا کې پريکټس کوي او سياسي پالوانان داسې جنګوي لکه څوک چې اوزګار شي او ميږي جنګوي. د جمهوريت په سر ځوړنده توره ده چې د لاندې ترې سياست ماته ماته ساه اخلي، پوره خبره نشي کولی.
صحافت
صحافت د څلورمې ستن په مثال د رياست يو ګټ ته سر اړام کړی دی او هغه تجزياتي عمل کوي چې د ماضي قیصه وي. په دغه قيصه کې مخصوص صحافيان هم کردار وي خو د نظريه حاجت ترمخه ورته لکه د عدليې نظريه ضرورت وایي چې هغه دور تېر شي نو بيا د سابقه جرنېلانو د کرپشن او په جمهوريت د شب خون قيصه کوي.
عوام
عوام يو هجوم دی، قوم نه دی. په کوم ملک کې چې د مختلفو قومونو مفادات د يو بل په ضد دي هغوی قوم نه، هجوم دی، بې شعورۍ ته عقيدت وایي او عقيدت د ړندو ګډا ده. دا هجوم د سرمايه دارو، جاګيردارو اعلا بالا طبقې لپاره راپاڅي خو د ځان لپاره نه.
دا هاغه سرتور سرونه دي چې هر څوک پرې راشي خپله ټوپۍ یې په سر کېږدي او سر ورله د جزباتي عقيدت په انستهيزيا ویده کړي. ټول عمر په نشه په خوب کې ګرځي.
نتيجه
نتيجه داده چې پاکستان په ځوانیمرګۍ کې په ۱۹۷۱ يو ځل مړ شوی دی، نو په بوډا عمر کې خو فالج خامخا وي، دا بوډا په Icu کې دی.
که په داسې عمر کې مضبوط سوويت يونين د علاج باوجود مړ شوی دی نو په وينټي لېټر پروت پاکستان به ترڅو مصنوعي سا اخلي.
یادونه: دا لیکنه د لیکوال خپل نظر دی او د افغانستان انټرنشنل پښتو سیاست نه منعکسوي.
د پاکستان د پوځ د عامه اړیکو ادارې د یوې خبرپاڼې په خپرولو سره ویلي، د جمعې په ورځ د خیبر پښتونخوا په لکي مروت کې د استخباراتي معلوماتو پر بنسټ عملیاتو کې څلور وسلهوال وژل شوي او یو تن یې ژوندی نیول شوی دی.
په خبرپاڼه کې ویل شوي، چې امنیتي ځواکونو دغه عملیات په وانډه سیمه کې پیل کړي و.
د عملياتو پرمهال د پوځيانو او وسلهوالو ترمنځ سخته نښته شوې، چې په ترڅ کې یې څلور وسلهوال وژل شوي او يو تن ژوبل شوى د امنيتي ځواکونو لهخوا نيول شوى دى.
د پوځ د عامه اړیکو ادارې په وینا، د عملياتو پرمهال د وسلهوالو نه وسلې هم ترلاسه شوي دي.
خبرپاڼه زیاتوي:« د عملیاتو له پیلېدو مخکې، په سیمه کې اعلانونه وشول چې کلیوال دې غرونو ته له تګه ډډه وکړي.»
هغه زیاته کړه، وسلهوالو د کلي سره نږدې په غرونو کې خپل پټنځایونه جوړ کړي وو.
د پاکستان پوځ وايي، تېره او وړمه شپه د پښتونخوا په لکي مروت کې یې څلور او په شمالي او سوېلي وزیرستان کې یې شپږ وسلوال وژلي دي. له بلې خوا نن د پاکستان پوځ د هغو څلورو پوځیانو جنازه هم وکړه چې پرون په وزیرستان کې وژل شوي وو.
د پوځ د عامه اړیکو دفتر د جمعې په ورځ وویل، د پښتونخوا د بنو ولسوالۍ په لکي مروت کې د استخباراتي معلوماتو له مخې یې پرون عملیات کړي دي.
پوځ وايي، په دې عملیاتو کې یې پر څلورو وسلوالو وژلو سربېره یو ټپې شوی وسلوال نیولی هم دی.
ای ایس پي ار زیاتوي، چې پرون او وړمه ورځ یې په شمالي او سوېلي وزیرستان کې یې په خاورې مولا مشهور د حضرت زمان په نوم د یوه مهم قومندان په ګډون شپږ وسلوال وژلي دي.
پوځ په خپله اعلامیه کې ویلي، دې وسلوالو د امنیتي ځواکونو پر وړاندې په «ترهګریزو» فعالیتونو او د بې ګناه ملکي خلکو په هدفي وژنه کې لاس درلود.
د پاکستان پوځ پرون منلې وه چې په وزیرستان کې یې امنیتي ځواکونو ته مرګ ژوبله اوښتې ده. نن په دغو بریدونو کې د څلورو وژل شویو پوځیانو جنازې وشوې.
د اسټرالیا کرېکټ ملي لوبډلې د جمعې په ورځ د هند په بنګلور کې سیالې پاکستانۍ لوبډلې ته د ۶۲ منډو په لوی توپیر ماتې ور کړه. اسټرالیا د پنځوسو اورونو په لوبولو سره پاکستانۍ لوبډلې ته ۳۶۸ منډې هدف وټاکه، خو سیالې لوبډلې ایلا ۳۰۵ منډې جوړې کړې.
د کرېکټ نړیوال جام دا ۱۸ سیالي د بنګلور ښار په چنا سوامي لوبغالي کې د اسټرالیا په توپ وهلو پیل شوه.
اسټرالیا د نهو لوبغاړو په سوځېدو او د ټولو اورونو په لوبولو سره ۳۶۷ منډې وکړې.
د اسټرالیا لومړنیو دوو لوبغاړو ډیویډ وارنر ۱۶۳ او میچل مارش۱۲۱ منډې جوړې کړې.
په دې لوبه کې شاهین اپریدي پنځه او حارث سهیل ۳ اسټرالیايی لوبغاړي وسوځول.
د پاکستان لوبډلې هم ښه پیل وکړ او لومړنیو دوو لوبغاړو امام الحق او عبدالله شفیق ۱۳۴ منډې جوړې کړې او دواړو پنځوسیزې هم وکړې.
خو وروسته یې لوبغاړي ونه ځلېدل او د ټولو لوبغاړو په سوځېدو سره یې ۴۵.۳ اور کې ۳۰۵ منډې جوړې کړې او لوبه ترې اسټرالیا وګټله.
اسټرالیا په دې جام کې څلور لوبې کړې، چې دوه یې ګټلې او دوه یې بایللې دي.
پاکستان هم څلور لوبې کړې چې دوه یې ګټلې او پکې یې نن له اسټرالیا او مخکې له هند ماتې خوړلې ده.
د کرېکټ نړیوال جام د اکټوبر پر پنځمه په هند کې پیل شو او د نومبر تر ۱۹ به روان وي.
په سږني جام کې د افغانستان، اسټرالیا، بنګله دېش، انګلنډ، هند، هالنډ، نيوزیلنډ، پاکستان، سوېلي افریقا او سریلانکا ملي لوبډلې ګډون لري.