په لکي مروت کې څلور وسلهوال وژل شوي دي
د پاکستان د پوځ د عامه اړیکو ادارې د یوې خبرپاڼې په خپرولو سره ویلي، د جمعې په ورځ د خیبر پښتونخوا په لکي مروت کې د استخباراتي معلوماتو پر بنسټ عملیاتو کې څلور وسلهوال وژل شوي او یو تن یې ژوندی نیول شوی دی.
د پاکستان د پوځ د عامه اړیکو ادارې د یوې خبرپاڼې په خپرولو سره ویلي، د جمعې په ورځ د خیبر پښتونخوا په لکي مروت کې د استخباراتي معلوماتو پر بنسټ عملیاتو کې څلور وسلهوال وژل شوي او یو تن یې ژوندی نیول شوی دی.
په خبرپاڼه کې ویل شوي، چې امنیتي ځواکونو دغه عملیات په وانډه سیمه کې پیل کړي و.
د عملياتو پرمهال د پوځيانو او وسلهوالو ترمنځ سخته نښته شوې، چې په ترڅ کې یې څلور وسلهوال وژل شوي او يو تن ژوبل شوى د امنيتي ځواکونو لهخوا نيول شوى دى.
د پوځ د عامه اړیکو ادارې په وینا، د عملياتو پرمهال د وسلهوالو نه وسلې هم ترلاسه شوي دي.
خبرپاڼه زیاتوي:« د عملیاتو له پیلېدو مخکې، په سیمه کې اعلانونه وشول چې کلیوال دې غرونو ته له تګه ډډه وکړي.»
هغه زیاته کړه، وسلهوالو د کلي سره نږدې په غرونو کې خپل پټنځایونه جوړ کړي وو.
د پاکستان پوځ وايي، تېره او وړمه شپه د پښتونخوا په لکي مروت کې یې څلور او په شمالي او سوېلي وزیرستان کې یې شپږ وسلوال وژلي دي. له بلې خوا نن د پاکستان پوځ د هغو څلورو پوځیانو جنازه هم وکړه چې پرون په وزیرستان کې وژل شوي وو.
د پوځ د عامه اړیکو دفتر د جمعې په ورځ وویل، د پښتونخوا د بنو ولسوالۍ په لکي مروت کې د استخباراتي معلوماتو له مخې یې پرون عملیات کړي دي.
پوځ وايي، په دې عملیاتو کې یې پر څلورو وسلوالو وژلو سربېره یو ټپې شوی وسلوال نیولی هم دی.
ای ایس پي ار زیاتوي، چې پرون او وړمه ورځ یې په شمالي او سوېلي وزیرستان کې یې په خاورې مولا مشهور د حضرت زمان په نوم د یوه مهم قومندان په ګډون شپږ وسلوال وژلي دي.
پوځ په خپله اعلامیه کې ویلي، دې وسلوالو د امنیتي ځواکونو پر وړاندې په «ترهګریزو» فعالیتونو او د بې ګناه ملکي خلکو په هدفي وژنه کې لاس درلود.
د پاکستان پوځ پرون منلې وه چې په وزیرستان کې یې امنیتي ځواکونو ته مرګ ژوبله اوښتې ده. نن په دغو بریدونو کې د څلورو وژل شویو پوځیانو جنازې وشوې.
د اسټرالیا کرېکټ ملي لوبډلې د جمعې په ورځ د هند په بنګلور کې سیالې پاکستانۍ لوبډلې ته د ۶۲ منډو په لوی توپیر ماتې ور کړه. اسټرالیا د پنځوسو اورونو په لوبولو سره پاکستانۍ لوبډلې ته ۳۶۸ منډې هدف وټاکه، خو سیالې لوبډلې ایلا ۳۰۵ منډې جوړې کړې.
د کرېکټ نړیوال جام دا ۱۸ سیالي د بنګلور ښار په چنا سوامي لوبغالي کې د اسټرالیا په توپ وهلو پیل شوه.
اسټرالیا د نهو لوبغاړو په سوځېدو او د ټولو اورونو په لوبولو سره ۳۶۷ منډې وکړې.
د اسټرالیا لومړنیو دوو لوبغاړو ډیویډ وارنر ۱۶۳ او میچل مارش۱۲۱ منډې جوړې کړې.
په دې لوبه کې شاهین اپریدي پنځه او حارث سهیل ۳ اسټرالیايی لوبغاړي وسوځول.
د پاکستان لوبډلې هم ښه پیل وکړ او لومړنیو دوو لوبغاړو امام الحق او عبدالله شفیق ۱۳۴ منډې جوړې کړې او دواړو پنځوسیزې هم وکړې.
خو وروسته یې لوبغاړي ونه ځلېدل او د ټولو لوبغاړو په سوځېدو سره یې ۴۵.۳ اور کې ۳۰۵ منډې جوړې کړې او لوبه ترې اسټرالیا وګټله.
اسټرالیا په دې جام کې څلور لوبې کړې، چې دوه یې ګټلې او دوه یې بایللې دي.
پاکستان هم څلور لوبې کړې چې دوه یې ګټلې او پکې یې نن له اسټرالیا او مخکې له هند ماتې خوړلې ده.
د کرېکټ نړیوال جام د اکټوبر پر پنځمه په هند کې پیل شو او د نومبر تر ۱۹ به روان وي.
په سږني جام کې د افغانستان، اسټرالیا، بنګله دېش، انګلنډ، هند، هالنډ، نيوزیلنډ، پاکستان، سوېلي افریقا او سریلانکا ملي لوبډلې ګډون لري.
فلسطیني چارواکي وايي، په غزې تړانګه کې د یونان ارتودوکس پر یوې کلیسا د اسراییل په هوايي برید کې ۱۸ فلسطینیان وژل شوي دي. د کریتاس مرستندویه موسسې هم اعلان کړی، چې په دغه برید کې د دغې ادارې یو ځایي کارکوونکی هم وژل شوی دی.
دا پېښه تېره شپه شوې ده.
د اسراییل پوځ ویلي، د پوځي ملېشو د قوماندانۍ پر مرکز برید کې د کلیسا یوه برخه زیانمنه شوې او د دې پېښې په اړه پلټنې کوي.
فلسطیني چارواکو ویلي، لږ تر لږه ۵۰۰ مسلمانانو او عیسویانو د اسراییل د بمبارۍ له امله کلیسا ته پناه وړې ده.
کریټاس مرستندویه موسسې ویلي، چې د دغې ادارې ځايي کارکوونکی په داسې حال کې وژل شوی، چې له خپلې کورنۍ سره یې کلیسا کې پناه اخیستې وه.
ارتودوکس کلیسا په یوه بیانیه کې د اسراییل برید په کلکه غندلی دی.
د اسراییل پوځ اعلان وکړ، چې د دوی جنګي الوتکو د قوماندې یو مرکز په نښه کړی چې د اسراییل پر ضد کارول کېده.
د فلسطیني روغتیايي چارواکو په وینا، په غزه کې د اسراییل د بریدونو له امله شاوخوا درې زره او اته سوه کسان وژل شوي او تر یو میلیون ډېر کسان بې کوره شوي دي.
په غزه کې د ملکي وګړو د وضعیت په اړه راپورونه ښیي چې دوی د خوړو، اوبو، سونتوکو او طبي وسایلو له سخت کمښت سره مخ دي.
د ملګرو ملتونو د بشري حقونو دفتر د غزې په الاهلي روغتون کې د چاودنې په اړه د یوې خپلواکې نړیوالې څېړنې غوښتنه کړې ده. د غزې د روغتيا وزارت د تلې په ٢٥مه نېټه د دغه بريد د تلفاتو شمېر ٤٧١ تنه اعلان کړ. اسراییل او حماس په دې برید کې په لاس لرلو یو بل تورنوي.
د بېلا بېلو هېوادونو چارواکو دغه بريد د نه بښلو ګڼلی او د دغه برید د ابعادو د روښانه کولو غوښتنه يې کړې ده.
له دې پېښې وروسته د فلسطین روغتیا وزارت وویل، چې اسراییل د غزې پر الاهلي روغتون برید کړی دی.
اسراییلي پوځ دغه تورونه رد کړي او دا کار یې د فلسطین د اسلامي جهاد ډلې کار بللی، چې د یوه غلط توغندي د توغولو له امله یې دا پېښه رامنځ ته کړې ده. خو دغې ډلې په یوه پیغام کې د اسراییل دغه ادعا رد کړې ده.
د امریکا ولسمشر جوبایډن اسراییل ته تر خپل سفر مخکې په یوه بیانیه کې پر دغه روغتون د برید له امله خپله خواشیني څرګنده او د سپینې ماڼۍ د ملي امنیت ټیم ته یې امر کړی و، چې د برید لاملونه په کره توګه وڅېړي.
جوبایډن وروسته په اسراییل کې د دې پېښې په اړه وویل چې دا برید د «بل لوري» کار دی.
د فلسطین د ادارې مشر محمود عباس د چاودنې په غبرګون کې درې ورځنی ملي ماتم اعلان کړ او د امریکا له ولسمشر سره یې خپله پلان شوې ناسته لغوه کړه.
د ملګرو ملتونو سرمنشي انټونیو ګوټرش د غزې په الاهلي روغتون باندې د حملې په اړه خپله خواشیني څرګنده او ټینګار یې وکړ: «روغتونونه او طبي کارکونکي د نړیوالو قوانینو تر ساتنې لاندې دي».
بې پولې ډاکټرانو په دې روغتون باندې د برید په اړه د "خواشینې" په څرګندولو سره، دا کړنه «ډله ییزه وژنه» او د نه منلو وړ» عمل وباله او ویې ویل: «هیڅ هم پر روغتون دا ټکان ورکوونکی برید نه توجیه کوي چې ناروغان، طبي کارکوونکي او د جګړې کډوال وو. دا وینه تویونه باید ودرول شي».
د بشري حقونو د څار ادارې دغه برید «وحشتناک» بللی او د نړۍ له مشرانو یې غوښتي چې د دې پراخو ظلمونو او د انسانانو د وژل کېدو د مخنیوي لپاره اقدام وکړي.
پر دغه روغتون د برید او اسراییل ته د بایډن د سفر په غبرګون کې د حزب الله ډلې د چهارشنبې ورځ «د تلې ۲۶مه» د اسراییل پر وړاندې د «بې ساري قهر» د ورځې په توګه اعلان کړه.
د فلسطین ملاتړو د دغه برید په اعتراض کې په بېلابېلو هېوادونو کې پراخ لاریونونه وکړل.
خو د اسراييل لومړي وزير بنيامين نتن ياهو وويل: «ټوله نړۍ په دې پوهيږي چې په غزه کې وحشي ترهګر هماغه کسان وو چې د غزې پر روغتون يې بريد وکړ، نه د اسراییل پوځ. هغوی چې زموږ ماشومان په بې رحمانه توګه وژلي، خپل ماشومان هم وژني».
په ملګروملتونو کې د اسراییل سفیر هم د غزې په روغتون د حملې مسوولیت د اسلامي جهاد وباله او ویې ویل: «په دغو داعش ترهګرو باور مه کوئ. هغوی چې په بې باکه توګه پر ملکي خلکو توغندي ولي فلسطینیان دي، چې له کلونو راهیسې دا کار کوي».
د طالبانو د رییس الوزرا مرستیال د پاکستان د سفارت له شارژدافیر سره په لیدنه کې ویلي، چې د افغان کډوالو د ایستلو په اړه د اسلام اباد پرېکړه د دواړو هېوادونو د خلکو ترمنځ واټن رامنځته کوي.
عبدالسلام حنفي له عبیدالرحمن نظاماني سره په لیدنه کې له پاکستانه وغوښتل چې د افغان کډوالو پر ایستلو دې له سره غور وکړي.
د طالبانو ارګ په یوه خبرپاڼه کې لیکلي چې عبدالسلام حنفي له عبیدالرحمن نظاماني سره د افغان کډوالو په اړه خبرې اترې کړې دي.
پاکستان ټولو بې اسناده کډوالو ته خبرداری ورکړی چې د اکټوبر تر پایه دې له دغه هېواده ووځي.
د پاکستاني چارواکو د شمېر له مخې، د بې اسناده افغان کډوالو د ایستلو له مهالوېش څخه تر اوسه له ۵۱ زره ډېر افغانان ایستل شوي دي.
عبدالسلام حنفي په تورخم او سپین بولدک دروازو کې د افغانانو د تګ راتګ لپاره د اسنتیاوو د برابرولو غوښتنه هم وکړه.
ښاغلي حنفي دغه راز د هغو ماشومانو، ښځو او ناروغانو د خلاصون غوښتنه هم وکړه، چې په پولو کې د پاکستاني ځواکونو له خوا نيول شوي او بنديان دي.
د طالبانو ارګ دعبیدالرحمن نظاماني له قوله لیکلي، چې د طالبانو پیغامونه او غوښتنې به پاکستاني چارواکو ته ورسوي.