د طالبانو کنټرول کې باختر خبري اژانس وایي، چې دې ډلې د یکشنبې په ورځ د خوست ښار مختلفو سیمو کې د امنیتي کمرو نصبول پیل کړل. د خوست لپاره د طالبانو د پولیسو د جنايي برخې مدیر محمد صابر صابري وايي، چې د دې کمرو لګول به د مجرمانو په موندلو کې مرسته وکړي.
د هغه په خبره؛ په دې کمرو سره به جرمونه هم را کم شي.
د دې راپور له مخې؛ ټاکلې شوې ده، چې دا کمرې د ښار په ننوتلارو او بیروباري سیمو کې ولګول شي.
ویل کېږي، چې د دې کمرو نصبول به څو ورځې وخت ونیسي.
طالبانو د امنیت ټینګولو لپاره تېر دوبی په کابل کې هم د ۶۰ زره امنیتي کمرو د نصبولو خبره وکړه.
هغه مهال د بښنې نړۍوال سازمان وویل، چې دا ډله د امنیتي کمرو په لګولو سره د افغان وګړو د څار او جاسوسۍ بشپړ سیسم رامنځته کوي.
