افغان خبریال مرتضی بهبودي چې د طالبانو په بند کې له ۲۸۴ ورځو تېرولو وروسته خوشې شو، د دوشنبې په ورځ یې په فرانسه کې وویل چې د رسنیو فشار د هغه ژوند وژغوره. د بې پولې خبریالانو سازمان عمومي منشي هم د بهبودي له نیول کېدو وروسته د رسنیو خبري پوښښ «غوره» وباله.
مرتضی بهبودي د دوشنبې په ورځ په فرانسه کې د بې پولې خبریالانو په مرکزي دفتر کې په یوه خبري کنفرانس کې وویل: «له رسنیو پرته به زه ژوندی نه وای پاتې.»
نوموړي له افغانستان انټرنشنل او نورو رسنيو څخه مننه وکړه چې د نوموړي د نيول کېدو او د هغه د خلاصون لپاره يې نړيوال کمپاين تر پوښښ لاندې راوست.
د بې پولې خبریالانو سازمان مشر ویلي چې د رسنیو پوښښ «طالبانو ته یو په زړه پورې مهم پیغام استولی.»
بهبودي د ۱۴۰۱ کال د مرغومي په میاشت کې د افغانستان د وضعیت په اړه د راپور جوړولو په موخه کابل ته ولاړ، خو دوه ورځې وروسته د طالبانو له خوا د جاسوسۍ په تور ونیول شو او بالاخره د طالبانو له بنده ۲۸۴ ورځې وروسته خوشې شو.
دغه خبریال د دوشنبې په ورځ د کابل د مرکزي زندان د تجربې په اړه وویل چې شاوخوا ۱۲۰۰ نور سیاسي بندیان هم هلته ساتل کېږي.
د هغه په وينا، سره له دې چې څو ځلې د طالبانو له خوا تر پوښتنو ګروېږنو لاندې نيول شوى او ځورول شوى هم دی، فکر یې نه کولو چې دى به ژوندى ووځي.
ښاغلي بهبودي وویل چې، د محکمې له پنځو جلسو وروسته بالاخره بې ګناه وپیژندل شو او په دې شرط خوشې شو چې «په راتلونکي کې به د مطالبو د خپرولو لپاره د طالبانو تاییدي ترلاسه کړي.»
