د پاکستان پلازمېنه اسلام اباد او خیربښتونخوا کې ځینې افغانان شکایت کوي، چې په کرېکټ نړیوال جام کې د افغان لوبډلې له خوا پاکستان ته له ماتې ور کولو وروسته د دوی پر کورونو د پولیسو چاپې ډېرې شوې دي. دغه افغانان وايي قانوني اسناد لري، خو بیا یې هم پولیس د شپې پر کورونو چاپې اچوي.
حمیدالله چې له کلونو راهسې د پيښور په حیات اباد ښارګوټي کې اوسیږي افغانستان انټرنشتل ـ پښتو ته نن «لړم ۵ مه» وویل « کله چې افغانستان کرېکټ ګټلی، هره شپه ځايي پولیس د حیات اباد په بېلابیلو برخو کې د افغانانو پر کورونو چاپې اچوي، د اسنادو له کتو پرته افغانان بندیانوي»
په اسلام اباد کې دوه افغان میرمنو مدینه او خدیجه چې یوې پاکستانۍ رسنۍ سره یې خبرې کړي، وايي په پاکستان کې د اوسېدو قانوني اسناد لري خو په اسلام اباد کې یو پاکستاني پولیس ورسره ناوړه چلند کړی دی.
دغه افغان میرمنې وايي پاکستاني پولیسو ورته ویلي ستاسو د پوښتنې څوک نشته او بیا یې په تاڼه کې څلور ساعته زنداني کړې.
دوی په خپلو خبرو کې وايي چې د امریکا ویزې لپاره په اسلام اباد کې په تمه دي.
ډیری افغانان په اسلام اباد کې بهرنیو هیوادونو ویزو لپاره په تمه دي.
له دې وړاندې په اسلام اباد کې د طالبانو تر کنټرول لاندې د افغانستان سفارت کې طالب چارواکو اندېښنه ښودلې وه، چې د اسلام اباد په شمول د پاکستان په ګڼو ښارونو کې قانوني اسنادو لرونکو افغانانو سره د پاکستاني نظامیانو چلند غیرانساني دی.
دوی ویلي و، چې د شکنجو له امله ځیني افغانان د پاکستان په زندانانو کې مړه شوي هم دي.
د پاکستان پر وړاندې د افغانستان کرېکټ بریا وروسته د لوبې غوره لوبغاړي ابراهیم ځدراڼ خپل کپ افغان کډوالو ته ډالۍ کړ چې له پاکستان په زور اېستل شوي.
د نوموړي کار په رسنیو کې د پاکستانیانو غبرګونونه راپارول.
