د امریکا د بهرنیو چارو وزیر انټوني بلېنکن ترکیې ته د خپل سفر په ترڅ کې د دغه هېواد د بهرنیو چارو له وزیر سره لیدلي او د دغې لیدنې وروسته یې ویلي؛ دوی ډاډ لري چې د ناټو په غړو هېوادونو کې به د سوېډن د غړیتوب هڅې کړندۍ شي.
څو میاشتې وړاندې د ترکیې ولسمشر رجب طیب اردوغان د ناټو په تړون کې د سوېډن د غړیتوب په اړه مخالفت څرګند کړی و.
که څه هم بلېنکن او د ترکیې د بهرنیو چارو د وزیر د خبرو بشپړ جزییات نه دي روښانه شوي؛ خو د بلېنکن له خبرو ښکاري، چې د دواړو هېوادونو د بهرنیو چارو د وزیرانو تر منځ د خبرو یو مهم بحث په ناټو کې د سوېډن داخلېدل وو.
بلېنکن له دې سفره وړاندې ویلي وو، چې دی ډاډه دی په دغه برخه کې به ځانګړی پرمختګ وشي.
له دې وړاندې اوکراین هم له ناټو غړیو هېوادونو څخه غوښتي وو، چې دغه هېواد د ناټو په تړون کې شامل کړي؛ له دغې غوښتنې سره روسیې مخالفت ښودلی و.
