طالبانو د نیمروز ولایت د مرکز زرنج ښار په لوبغالي کې د جمعې په ورځ، ۲۵ تورن کسان په دورو ووهل. باختر اژانس د طالبانو د محاکمو د رياست د مطبوعاتي مسوول سخي احمد جلالي له خولې لیکلي چې دغه کسان په بېلابېلو جرمونو لکه په غلا او نامشروع اړيکو تور نيول شوي وو.
باختر خبري اژانس چې د طالبانو تر کنټرول لاندې دي په خپل رپوټ کې ليکلي دي چې تورن کسان د نيمروز ولايت د ښاري محکمو د استيناف محکمې له خوا په مجازاتو محکوم شوي و.
د پنجشنبې په ورځ په نیمروز کې د طالبانو د محاکمو مشر اعلان وکړ چې د جمعې په ورځ به د زرنج په ورزشي لوبغالي کې خلکو ته سزا ورکوي.
په نیمروز کې طالبانو د دغه ولایت اوسېدونکو او سیمه ییزو خبریالانو ته اجازه نه ده ورکړې چې د دې پېښې عکسونه واخلي.
د زرنج ښار څخه يوه عيني شاهد افغانستان انټرنيشنل ته وويل چې طالبانو يو شمېر هغه ځوانان هم ووهل چې غوښتل يې د تورنو کسانو د سزا ويډيو واخلي.
