د ماشومانو لپاره د ملګرو ملتونو د وجهي صندوق مشرې کاترین رسل د چهارشنبې په ورځ د ملګرو ملتونو د امنیت شورا یوې غونډې ته وویل، چې د غزې تړانګه د ماشومانو لپاره په نړۍ کې تر ټولو په خطرناکه ځای بدل شوې ده.
هغې وویل، چې په جګړه کې بشري وقفې د غزې د ماشومانو د "وژل کېدو" د پای ته رسولو لپاره کافي نه دي.
مېرمن رسل د اسراییل او حماس ترمنځ د موقتي اوربند په اړه د هوکړې هرکلی وکړ.
هغې وویل، چې ۴۶ ورځو جګړې په لړ کې ۵ زره او ۳۰۰ څخه زیات فلسطیني ماشومان وژل شوي دي.
هغه وایي؛ باید په غزه کې د ماشومانو د وژلو او معلولو مخه ونیول شي.
د یونېسف مشرې زیاته کړه: "د راپورونو له مخې؛ د شاوخوا یو زرو ۲۰۰ ماشومانو جسدونه د هغو ودانیو تر خاورو خځلو لاندې پاتې دي، چې د بمباریو له امله ویجاړې شوې دي."
دې وويل، چې اوسمهال يو ميليون ماشومان د خوراکي توکو له کمښت سره مخامخ دي.
د ملګرو ملتونو دغې لوړپوړې چارواکې د جګړې پر ښکېلو غاړو غږ کړی، چې د تلپاتې سولې پر لور دې د لومړي ګام په توګه بشري اوربند ته غاړه کېږدي.
