د حماس هغه پوځي ډله چې د غزې کنټرول په لاس کې لري، د یکشنبې په ورځ یې ویلي چې له اسراییل سره په جګړه کې یې یو لوړپوړی قوماندان وژل شوی دی. د دغې ډلې پوځي څانګې د قسام لېوا منلې چې د غزې په شمال کې د دې ډلې د جنګیالو مشر ابو انس الغندور او درې نور قوماندانان وژل شوي دي.
د اسراییل پوځ د نومبر د میاشت په پیل کې ویلي وو، چې د حماس پر تونلونو برید کې یې الغندور په نښه کړی؛ خو د هغه د وژل کېدو په اړه یې څه نه وو ویلي.
نن د اسراییل او حماس ترمنځ د څلور ورځني اوربند درېیمه ورځ ده.
دغه اوربند په غزه کې د برمته شویو اسرايیلیانو په بدل کې په اسرايیلي زندانونو کې د بندي فلسطینیانو د تبادلې د اسانولو لپاره اعلان شوی دی.
اسراییل ويلي، چې د سې شنبې په سهار د اوربند له پای ته رسېدو وروسته به په سیمه کې خپل پوځي عملیانو ته دوام ورکړي، چې اصلي هدف یې د حماس له منځه وړل بلل شوي.
داسې انګېرل کیږي، چې پر اسراییل د حماس د اکټوبر د اووم برید د غچ اخیستو لپاره د اسراییل له خوا په پیل شویو بریدونو کې د حماس یو شمېر چارواکي او قوماندانان وژل شوي وي.
د اسراییل په سویل کې د حماس په دغه برید کې شاوخوا ۱۲۰۰ کسان وژل شوي او شاوخوا ۲۴۰ کسان یرغمل شوي وو.
