د ترکیې ولسمشر اردغان د اسراییل لومړی وزیر نتنیاهو "د غزې قصاب" وباله
رجب طیب اردوغان د چهارشنبې په ورځ وویل، چې د اسراییل لومړی وزیر بنیامین نتنیاهو په غزه کې د پېړۍ تر ټولو ستر جنایت ترسره کړی او خپل نوم یې د غزې د قصاب په نوم ثبت کړ.
رجب طیب اردوغان د چهارشنبې په ورځ وویل، چې د اسراییل لومړی وزیر بنیامین نتنیاهو په غزه کې د پېړۍ تر ټولو ستر جنایت ترسره کړی او خپل نوم یې د غزې د قصاب په نوم ثبت کړ.
اردوغان دغه څرګندونې د ترکیې په پارلمان كې د عدالت او پراختيا ګوند په غونډه كې وكړې.
د ترکیې ولسمشر ویلي، هېواد به یې د ټولو یرغمل شویو کسانو د خلاصون او دایمي اوربند لپاره خپلې ټولې ډېپلوماټیکې هڅې ګړندۍ کړي.
رجب طیب اردوغان دا هم وویل، چې د اسراییلي چارواکو څرګندونو دا هیلې کمې کړې، چې د دښمنۍ ختمېدل به په دایمي اوربند بدل شي.
د اکټوبر په اوومه د اسراییل او حماس تر منځ د جګړې له پیل وروسته اردوغان په پرله پسې ډول نتنیاهو او اسراییلي چارواکي په غزه کې د بشري حقونو په سرغړونو تورن کړل.
د ترکیې ولسمشر د ملګرو ملتونو له سرمنشي انټونیو ګوتریش سره په یوه وروستۍ تلیفوني اړیکه کې اسراییل تورن کړ، چې پر غزې د خپلو بریدونو په ترڅ کې له نړۍوالو بشري قوانینو سرغړونه کوي.
