د پاکستان په چارو کې د افغانستان د پخواني جمهوري دولت ځانګړي استازي عمر داوودزي د افغانستان انټرنشنل- فارسي څانګې ته په یوې مرکې کې ویلي، چې په افغانستان کې د ترهګرو ډلو په شتون او له طالبانو سره د خلکو په ټکر کې د هېوادونو د بیا مداخلې امکان شته.
نوموړي وویل، چې دی د بهرنیو هېوادونو د مداخلې پلوی نه دی؛ خو که طالبان دوام وکړي "بهرنۍ مداخله به پېښه شي".
ښاغلي داوودزي ټینګار وکړ، چې د ۱۹۷۰ کلونو په څېر په افغانستان کې د ترهګرو ډلو شتون د طالبانو د واکمنۍ لپاره یو ګواښ دی.
هغه وويل: "هغه ډلې چې تېر ځل يې د سقوط لامل شو او نور هېوادونه يې اړ کړل چې افغانستان ته راشي او مداخله وکړي، هماغه حالت به تکرار شي".
طالبانو تل په افغانستان کې د وسله والو او ترهګرو ډلو د موجودیت خبره رد کړې ده.
په دغو ډلو کې د پاکستاني طالبانو تحریک هم دی، چې د افغان طالبانو تر څنګ په افغانستان کې د پخواني افغان حکومت او بهرنیو ځواکونو پر ضد په جګړه بوخت وو.
د پاکستان حکومت وايي، چې تحریک طالبان پاکستان له افغانستانه پر دغه هېواد بریدونه کوي او له افغان طالبانو یې غوښتي چې د دغې ډلې غړي له افغانستانه وباسي.
افغان طالبانو دا ادعا رد کړې او د اسلام اباد او پاکستاني طالبانو تر منځ یې د وسله والو د بریدونو د ستونزې د حل لپاره پر هوکړې ټینګار کړی دی.
د پاکستان لپاره د پخواني ولسمشر اشرف غني دغه استازي وویل، چې افغان ټولنه بدله شوې او د افغانانو لویه برخه لوستي او ښاري اوسېدونکي دي.
د هغه په وينا؛ لوستی قشر له طالبانو سره په تقابل کې واقع شوی دی.
هغه وړاندوينه کوي، چې داخلي شخړې به د نورو هېوادونو پښې افغانستان ته وغځوي؛ خو داوودزي ټینګار وکړ، چې "که بهرنیان د افغانانو په استازیتوب هر څومره پرېکړې وکړي، دا به بې پایلې وي".
