په هغه نوملړ کې چې د خیبر پښتونخوا پولیسو خپور کړی، د ګلالۍ اسماعیل نوم هم له ورایه په کې ښکاري. ګلالۍ اسماعیل چې دا مهال د امریکا په متحده ایالاتو کې ژوند کوي او په خټه د خیبر پښتونخوا د صوابۍ ده، د پاکستان د حکومت سر سخته مخالفه ده.
اغلې اسماعیل هغه مهال امریکا ته کډواله شوه، چې په ۲۰۱۹ کال کې پاکستاني چارواکو د هغې د نیولو هڅه کوله.
خو په خپله ګلالۍ اسماعیل په ایېس پاڼه د دغه نوملړ له خپرولو وروسته په یو توند غبرګون کې ویلي، هغه د ترهګرۍ له شره له پاکستانه وتلې او دا د نه منلو ده چې هغه دې اوس د پاکستاني چارواکو لهخوا د ترهګرۍ په ملاتړ تورنیږي.
هغې په خپله اېکس پاڼه زیاته کړې، دا ټولو ته د خندا وړ خبره ده چې د ترهګرو پر ضد د یوې مبارزې او د بشري حقونو د فعالې نوم دې د ترهګرو د ملاتړو په نوملړ کې راشي.
د پاکستان حکومت لهخوا په دغه خپور شوي نوملړ کې د یوشمېر نورو فعالانو او د خبریال احسان داوړ نوم هم راغلی، چې د ځینو فعالانو لهخوا دغه نوم لړ غندل شوی او بې بنسټه ګڼل شوی دی.
د پاکستان پر حکومت تل دا نیوکې کېږي، چې پر یو شمېر فعاله سیاستوالو او د پښتون ټبر پر مخکښو کسانو د ترهګرۍ تورونه لګوي او په دې توګه غواړي، چې د پښتنو د عدالت غوښتنې غږونه ټپ کړي.
