د تاجکستان ولسمشر امر کړی، چې د ابوالقاسم فردوسي له خوا لیکل شوې حماسي شاهنامه دې چاپ او په تاجکستان کې دې د دغه هېواد خلکو ته ووېشل شي. امام علي رحمان څرګنده کړه، چې په دې کار سره غواړي د تاجکستان خلک د خپلو نيکونو له تاريخ، کلتور او تمدن څخه زيات خبر شي.
په هغه خبرپاڼه کې چې د تاجکستان د ولسمشر له رسمي فیسبوک پاڼې څخه خپره شوې راغلي، چې ښاغلي رحمان دغه څرګندونې د سې شنبې په ورځ (د لیندۍ په ۱۴مه) د تاجکستان د مشهور څېړونکي باباجان غفوروف د یاد غونډې په مراسمو کې د شاهنامې د چاپ او وېشلو په اړه کړي.
په دې ناسته کې ښاغلي رحمان د تاجکانو د «ویاړلي علمي، ادبي، فرهنګي او تمدن د تاریخ» د ساتنې په اړه خبرې وکړې.
د ښاغلي رحمان د وینا یوه برخه د باباجان غفوروف د څېړنو د اهمیت په اړه وه.
د تاجکستان ولسمشر وویل، چې له صدرالدین عیني وروسته باباجان غفوروف د تاجکستان د تاریخ او تمدن په اړه هر اړخیزه مطالعه کړې ده.
شاهنامه چې د ابوالقاسم فردوسي له خوا لیکل شوې، د نړۍ یو له سترو او مشهورو حماسي نغمو مجموعه ده. فردوسي چې د ۳۲۹ او ۴۱۶ میلادي کلونو ترمنځ ژوند کاوه، د خپل ژوند دېرش کاله یې د شاهنامې په لیکلو تېر کړل.
