د ۲۰۲۳ کال ۱۹ کلنو اسیا جام سیالۍ نن جمعه د (لیندۍ ۱۷مه) د عربي متحده اماراتو په کوربه توب پیلیږي، د دغو سیالیو په لومړۍ لوبه کې افغانستان د هندوستان په وړاندې د سیالۍ ډګر ښکته کیږي او د همدې ورځې په اوږدو کې پاکستان د نیپال په وړاندې د سیالۍ ډګر ښکته کیږي.
د افغانستان کرېکټ بورډ وايي، د افغانستان د ۱۹ کلنو ملي لوبډلې د یادو پنځوس اوریزه لوبو لپاره بشپړ چمتوالۍ نیولی دی.
د ۱۹ کلنو د ۲۰۲۳ په پنځوس اوریز نړیوال جام کې اته لوبډلې یو د بل پر وړاندې لوبیږي.
بل خوا د افغانستان کرېکټ بورډ پر خپله اېکس پاڼه له لندن څخه د راشد خان او د افغانستان د ۱۹ کلنو ملي لوبډلې سره د خبرو کولو انځورونه خپاره کړي دي او وايي، راشد خان د زوم خواله رسنۍ له لارې د ۱۹ کلنو ملي لوبډلې سره خپلې تجربې شریکې کړې او لوبډله یې ښو لوبو کولو ته هڅولې ده.
راشد خان شاوخوا دوه اونۍ مخکې په لندن کې د ملا عملیات تر سره کړي او لا هم هلته تر درملنې لاندې دی.
همدارنګه د افغانستان کرېکټ بورډ تېره ورځ اعلان وکړ چې، د متحده عربي اماراتو سره د روانې میاشتې په ۲۵مه او ۲۷مه نیټه دوه تمریني لوبې او په ۲۹. ۳۱ او د ۲۰۲۴ کال د جنورۍ په دوهمه نیټه درې شل اوریزې لوبې تر سره کوي.
