د روح الله سنګر یوه نېږدې خپلوان افغانستان انټرنشنل - پښتو ته د یوه پیغام په لیږلو سره وویل، چې د طالبانو استخباراتي ځواکونو روح الله سنګر د یکشنبې په ورځ ( د لیندۍ ۲۶مه) وروسته له هغه نيولى، چې د چاريکارو ښار يوې سيمې ته د راپور جوړولو په موخه ورغلى و.
د معلوماتو له مخې؛ د ښاغلي سنګر د نيول کېدو انګېزه تر اوسه څرګنده نه ده.
دا په داسې حال کې ده، چې طالبانو څو ورځې وړاندې د تمدن ټلویزیون خبریال عبدالرحیم محمدي هم نیولی و، چې شاوخوا له لس ورځیني بند وروسته بېرته خوشې شو.
د خبریالانو دوامداره نیونې د خبریالانو ملاتړ بنسټونه اندېښمن کړي دي او دوی له طالبانو غواړي چې د بیان ازادي ته درناوی وکړي او د خبریالانو له نیولو ډډه وکړي.
تر اوسه پورې د خبریالانو بنسټونو د دې خبریال د نیولو په اړه کوم غبرګون نه دی ښودلی.
د طالبانو د لوړو زدکړو وزير نن په لغمان کې يوې غونډې ته وويل، چې که يې د نړۍ د تور ليست پروا ساتلای ۲۰ کاله به نه ورسره جنګېدلای. هغه نن لغمان ته د ۵ ميلونه افغانيو په لګښت د پوهنتون د ژورناليزم پوهنځي لپاره د راډیو د افتتاح لپاره تللی و.
نوموړي ژمنه وکړه، چې ډېر ژر به د لغمان پوهنتون لپاره د ماسټرۍ پروګرام، لاربراتوار، د پوهنتون لپاره احاطوي دیوال او د غونډ لپاره تالار جوړول هم منظور کړي.
د طالبانو د لوړو زدکړو وزير ندامحمد نديم يوې لویې غونډې ته وويل، چې نړۍ د بشري حقونو د سرغړونې په نوم ددوی پر وزيرانو بنديزونه لګوي او په تور ليست کې يې شاملوي.
د هغه په خبره، چې د نړۍ د تور ليست او بنديزونو پروا نه ساتي او دوی د شریعت او خپل مشر لاره تعقيبوي.
د نديم په خبره، چې نړۍ په فلسطين کې د روان ظلم په اړه چوپ ده او هلته، چې د ښځو او ماشومانو حقونه تر پښو لاندې کېږي، هغوی په تورليست کې نه شاملوي او ملګرتيا يې کوي. (( موږ که د نړۍ د تور ليست پروا ساتلای شل کاله به مو مقابله نه ورسره کولای، په فلسطين کې چې ښځۍ او ماشومان وژل کېږي نړۍ چوپ ده او هيڅ ظالم تور ليست ته نه اضافه کوي، د نړۍ دام يوازي د مسلمانانو بې اتفاقۍ ته جوړ دی)).
نديم وويل، چې د نړۍ هيڅ مرستې او لاسنيوي ته اړتيا نه لري او ټولې چارې د ولس په مالیې ورکولو مخ ته وړي.
د هغه په خبره، چې اوس هم د کفري نړۍ غلامان د دوی په وړاندې تخريب کوي او د ښځو په نوم د بشري حقونو د نقص بهانې کوې.
نوموړي محصلينو ته په خطاب کې وويل، چې تحصیلي نظام يې د تېر شل کلن فساد څخه خلاص کړی او بايد ځوانان په اسلامي فکر سمبال شي.
د طالبانو دغه چارواکي په تېرو شلو کلونو کې د لغمان د خلګو (قربانۍ) وستايلې او هيله يې وښوده، چې په راتلونکو پنځو کلونو کې به د هيواد د پرمختګ په برخه کې لوی مثبت بدلونه رامنځ ته شي.
د ښځو د حقونو فعاله ژولیا پارسي چې درې میاشتې وړاندې د طالبانو له خوا نیول شوې وه، نن دوشنبې د (لیندۍ ۲۷مه) د طالبانو له بند خوشې شوه. د ژولیا پارسي کورنۍ هم له افغانستان انټرنېشنل سره په خبرو کې د نوموړې د خوشې کیدو خبر تایید کړ.
طالبانو د تلې په ۵مه نوموړې په کابل کې نیولې وه او د نیولو علت یې هم د دغې ډلې د سخت دریځیو پروړاندې د ژولیا پارسي او یو شمیر نورو ښځینه فعالانو د غږ پورته کول بلل کیده.
نوموړې په داسې حال کې د طالبانو له بند خوشې کیږي چې څو ورځې مخکې یوه بله معترضه میرمن ندا پرواني هم له خپل زوی او خاوند سره یې د طالبانو له بند خوشي شول.
تراوسه د ژولیا پارسي د روغتیایي وضعیت په اړه کره معلومات نشته، خو نوموړې څو موده مخکې د نامعلوم علت له امله له بندخونې څخه روغتون ته لیږدول شوې وه.
یو شمیر میرمنو په ټولنیزو شبکو کې لیکلي و چې ژولیا پارسي "د طالبانو د وحشیانه شکنجو له امله د ناوړه فزیکي او رواني حالت سره روغتون ته وړل شوې."
د مېرمن پارسي کورنۍ ته د يوې نږدې سرچينې په ګډون باخبرو سرچينو هم روغتون ته د هغې لېږد تاييد کړى، خو طالبانو د مېرمن پارسي د لېږد د لامل، د ناروغۍ د څرنګوالي او يا هم د دې مېرمنې د جسمي حالت په اړه څه و نه ويل.
د افغانستان لپاره د چين ولسي جمهوريت ځانګړي استازي يو شيايوينګ د طالبانو د بهرنيو چارو وزير امير خان متقي سره په کتنه کې وویل چې دغه هیواد د افغانستان په کورنيو چارو کې لاسوهنه نه کوي. دواړو لوریو د افغانستان او چين د دوه اړخيزو اړيکو پر وروستيو پرمختګونو هم خبرې کړې دي.
د طالبانو د بهرنیو چارو وزارت ویاند عبدالقهار بلخي نن په خپله اېکس پاڼه کې همداراز لیکلي، ښاغلي متقي په دغه کتنه کې د مس عینک د عملي کار په پیل او چين ته د افغانستان د صادراتو پر زیاتیدو هم ټینګار وکړ.
له دې سره، د افغانستان لپاره د چين ولسي جمهوريت ځانګړي استازي يو شيايوينګ وويل چې چين له افغانستان څخه پر واردېدونکو توکو ګمرکي تعرفه تر ډېره له منځه وړې ترڅو د دواړو هېوادونو ترمنځ سوداګري وده وکړي.
د یادولو ده چې دواړو لوريو د اړیکو په پراختیا، د سوداګریزو راکړو ورکړو په زیاتوالي او سیاسي برخو کې په لا زیاتې همکارۍ ټینګار وکړ.
سره له دې د طالبانو اداره لکه نورو هیوادونو د چین له خوا هم په رسمیت نه ده پیژندل شوې، خو دغه هیواد له کلونو راهیسې له طالبانو سره کله په پټه او کله هم ښکاره ډول اړیکې ساتلي دي.
دغه يو ورځنی نندارتون نن دوشنبه د پکتيا په اطلاعاتو فرهنګ رياست کې جوړ شوی و. د طالبانو د اطلاعاتو او فرهنګ مشر ثواب جان اسلام يار وایي، د انځوريز نندارتون د جوړېدو موخه ددې هنر د فعالانو ستاينه او ملاتړ دی.
نوموړي له نقاشانو او انځورګرانو غوښتنه کړې، چې د دوی د نظام د اصولو او شریعت مراعتولو سره دي فعاليت وکړي.
په نندارتون کې سلګونه د نقاشۍ او انځورګرۍ تابلوګانې نندارې ته اېښودل شوې وې.
هنرمندانو د نورو نندارتونو پر عکس دا ځل په دغه نندراتون کې چاپيريال، ګلونه او سمسوري سيمې ډېري انځور کړې وې.
د نندارتون ګډوالو له طالبانو غوښتنه کړې، چې تابلوګانو ته دې بازار پيدا شې.
د يادوني وړ ده، چې ډېر وخت به انځورګرانو د ټولني ستونزې، غوښتنې او په خاص ډول د ښځو او ماشومانو د ژوند د سخت حالت پيغامونه د انځور په ژبه نندارې ته وړاندي کول.
د خوست ښار د پلازو او مارکېټونو یو شمیر ملکان شکایت کوي چې په دغه ولایت کې پر وسلو سمبال کسانو د کورنیو چارو وزیر سراج الدین حقاني په نامه زرواکي روانه کړې ده. دوی وايي دغې ډلې د خوست ښار د پلازو او مارکېټونو مالکانو ته خبرداری ورکړی چې چوکېداران دې د دوی په خوښه وګوماري.
د خوست ښار د پلازو او مارکېټونو څو تنو مالکانو نن دوشنبې د ( لیندۍ ۲۷ مه ) افغانستان انټرنشنل ـ پښتو ته وویل چې په دغه ولایت کې یو شمیر وسلوال چې ځانونه د طالبانو فدايي ګروپ غړي بولي، پر دوي فشار راوړی ترڅو د پلازو او مارکېټونو څوکېداران د دوی لخوا د هماهنکي په نامه جوړ شوي دفتر سره ځانونه ثبت کړي.
دوی وایي دا کسان یې ګواښي چې که دا کار ونه کړي نو د پلازو او مارکېټونو مالکانو سره به څوکېداران زندان ته ولیږي.
د خوست ښار یو شمیر څوکېدارانو افغانستان انټرنشنل ـ پښتو ته وویل چې اوس هم د دوی د اتحادیې د مشر بهادر په کډون ۸ تنه څوکېداران د طالبانو د خوست امنیه قومندانۍ کې زندانيان دي.
د دوی په خبره چې دغو وسلوالو کسانو ورڅخه غوښتي و چې د دوی لخوا د هماهنکي دفتر سره ټول څوکېداران ثبت او کارتونه واخلي او یا هم خپلې دندې پرېږدي.
د خوست ښار د پلازو او مارکېټونو ځینې مالکان وايي د خوست امنیه قومندان حافظ راشید چې د طالبانو د کورنیو چارو وزارت د مرستیال محمد نبي عمري ورور دی، دوی ته ویلي چې ددغو وسلوالو پرضد دې نه ودریږي او دغه قراراد له مرکز څخه دوی اخیستی دی او دا قرارداد به عملي کیږي.
دوی زیاتوي څو ځلې یې ددې ستونزې د حل لپاره د طالبانو کورنیو چارو وزارت ته ورغلي خو د سراج الدین حقاني په کډون له نورو چارواکو سره د لیدنې وخت نه دی ورکړل شوی.
دغه وسلوالو د خوست ښار د پلازو او مارکېټونو مالکانو او څوکېدارانو ته ویلي چې د څوګېدارانو د ګمارنې قرارداد یې د طالبانو له کورنیو چارو وزیر سراج الدین حقاني څخه اخیستی دی او ادعا لري چې نوموړي ته نژدې کسان هم دي.
د معلومات له مخې په ټول خوست ښار کې پلازې او مارکېټونه شاوخوا ۴۷۰ تنه څوکېداران لري.
ځايي سرچینو افغانستان انټرشنل ـ پښتو ته وویل چې دا کسان نیت لري چې د پلازو او مارکېټونو ترڅنګ دوکاندرانو څخه د څوکېدارانو په نامه زیاتې پیسې راټولې کړي خو یوازې ۶۰۰۰ افغانۍ څوکېدارانو ته د میاشتې تنخوا ورکړي. دا په داسې حال کې ده چې اوس مهال یو څوکېدار له ۱۰۰۰۰ افغانیو څخه تر ۱۵۰۰۰ افغانیو پورې تنخوا لري.
د خوست ښار یو څوکېدار وايي ( په هیواد کې بې کاري او ناوړه اقتصادي وضعیت او بلخوا دغه وسلوال چې ځانونه د کورنیو چارو وزیر سراج الدین حقاني نژدې کسان معرفي کوي له مونږه یوه مړۍ ډوډۍ په زوره اخلي، مونږ د طالبانو له مشرانو غواړو چې ددغو کسانو مخه ونیسي )
نه یوازې په خوست کې په یو شمیر نورو ولایتونو کې هم د طالبانو اړوند کسان د بېلابیلو لارو څخه غواړي د پيسو د عوایدو ځاینونه د چارو د سمون په بهانه په خپل کنټرول کې راولي.
ددې راپور په اړه مو هڅه وکړه، ترڅو په خوست کې د امنیه قومندانۍ او کابل کې د کورنیو چارو وزارت نظر ولرو، خو د هڅو سره په دې کار بریالي نشو.