د شمالي وزیرستان په یو شمېر سیمو کې د یوې نوې نامعلومې وسلوالې ډلې له لوري شپې پاڼې خپرې شوې او له ځایي خلکو یې غوښتي چې په دغو سیمو کې دې د دغې ډلې له هر ډول کړنو وروسته له غبرګون څخه ډډه وکړي.
ظاهرآ يې د سیمې خلکو ته خبرداری ورکړی چې خپلو شخصي موټرو ته لګېدلې تورې هیندارې دې پاکې کړي، خو د شپې پاڼې په بله برخه کې لیکل شوي چې په سیمه کې دې له هر ډول خبرو او بحثونو ډډه وشي.
دغه شپې پاڼې د شمالي وزیرستان په میرعلي، اسوخيل، میسکي، اسوړي، ډنډې درپه خیل، دته خیل، سپین وام او ځینو نورو سیمو کې خپرې شوې دي.
معمولآ په شمالي وزیرستان او ټولو قبایلي سیمو کې ځايي خلک د خپلو شخصي موټرونو هیندارې تورې لګوي او خلک یې شوق ګڼي.
دا لومړی ځل دی چې د اتحاد المجاهدین په نوم یوه نامعلومه وسلواله ډله چې تر دې وړاندې یې په دغه سیمه کې فعالیت نه درلود، داسې شپې پانې خپروي او په خلکو بندیزونه لګوي.
تر دې وړاندې د پاکستاني طالبانو تحریک یا ټي ټي پي خلکو ته خبرداری ورکړی و چې په وزیرستان او نورو قبایلي سیمو کې دې د ځنګلونو له پرې کولو لاس واخلې ګنې د دوی په خبره سزا به ورکړي.
په سیمه کې خپلواک خبریال لال وزیر وايي چې د دغې ډلې نوم یې نوی اوریدلی او پخوا تر دې په دغو سیمو کې په نورو نومونو وسلوالې ډلې فعالې وې، هغه وايي: « د دوی هدف دادی چې په سیمه کې یې هر ډول کړنې کولې ازاد به وي خو که د سیمې خلکو یې په وړاندې غونډه، احتجاج، خبرې یا بحث وکړ نو دوی به یې وژني، داسې ښايي چې یو ځل بیا په قبایلي سیمو کې تورې ورځې را روانې دي، دا یې شروع ده وروسته به وګورو چې بیا د ۲۰۱۴ غوندې د خلکو عام وژنې او هدفي وژنې زور واخلي.»
عجب ګل همت د شمالي وزیرستان د سپین وام اوسیدونکی دی، هغه وايي له څو ورځو راهیسې یې په ځینو سیمو کې داسې شپې پاڼې لیدلې دي چې خلکو ته په کې خبرداری ورکړل شوی.
هغه وايي د دغې ډلې نوم یې نوی اورېدلی او پخوا تر دې یې په داسې نوم د کومې وسلوالې ډلې فعالیت نه و لیدلی، دی زیاتوی: «وزیرستان د وسلوالو ګروپونو په لیباټرۍ یا لابراتوار بدل شوی هر څوک راځي او یو نوی قانون جوړوي او په خلکو یې تپي، موږ په دې نه پوهیږو چې دا اوس پوځ جوړه کړې که څه بله خبره ده خو دلته بیا د ۲۰۱۰ کلونو غوندې وسلوالې ډلې په ډېرېدو دي چې بیا څه پلان دی.»
په ۲۰۱۴ میلادي کال کې په ټولو قبایلي سیمو کې د پاکستان د پوځ له لوري د «ضرب عضب» په نوم پوځي عملیات پیل شول چې په یوه ورانکارې او اوږده جګړه بدل شول، د خلکو کورونه وران، ډیر خلک په کې ووژل شول او ډیر یې د خپلو مېنو پرېښودو ته اړ اېستل شول.
د پاکستان پوځ ویلي و، چې په هغو عملیاتو کې۳۰ زره پوځيانو برخه لرله او نږدې درې زره وسلوال یې وژلي او په دغو عملیاتو کې د پاکستاني پوځ هم درې نیم سوه عسکر وژل شوي و.
خو تر څنګ یې زرګونه پښتانه قبایل هم د دغو عملیاتو له کبله له خپلو سیمو څخه ایستلو ته اړ کړل شول چې لا هم د پاکستان نورو سیمو او د افغانستان خوست او پکتیکا ولایتونو ته کډه شول چې لا هم ډیری برخه یې هلته اوسیږي.
