ایرانی چارواکی: موږ له افغانستان سره پر پولو د خنډونو لګولو سره تګ راتګ محدودوو
د ايران د وسله وال پوځ د جغرافيايي سازمان مشر وويل، چې د يوه پراخ پلان پر بنسټ غواړي د فزيکي خنډونو په لګولو سره د افغانستان له پولو سره د تګ راتګ محدوديتونه وضع کړي.
د ايران د وسله وال پوځ د جغرافيايي سازمان مشر وويل، چې د يوه پراخ پلان پر بنسټ غواړي د فزيکي خنډونو په لګولو سره د افغانستان له پولو سره د تګ راتګ محدوديتونه وضع کړي.
امیر مجید فخري زاده په یوه نړیوال نندارتون کې وویل چې په دې برخه کې کار به د دوه اړخیزو خبرو اترو له لارې پر مخ ولاړ شي.
د ايسنا د خبر له مخې، ښاغلي فخري زاده د چهارشنبې په ورځ وويل: «زموږ دنده د پولو ساتنه ده، چې دا دنده ځینو ځایو کې یو طرفه او په ځینو ځایونو کې د ګاونډيو هېوادونو په همکارۍ ترسره کېږي.
امیر مجید فخري زاده ټینګار وکړ، چې دا فزیکي خڼډونه به په سویل ختیځو پولو کې ولګول شي.
هغه وویل چې په «راسک» کې د ایراني پولیسو پر پوسته له برید وروسته د ایران د دفاع وزارت د سرحدي سیمو په تجهیزولو سره د دغو سیمو د ساتنې مسوولیت په غاړه اخیستې دی.
د ایران د وسله والو ځواکونو د جغرافیې د سازمان مشر وویل: «باید په پام کې ولرو چې په ختیځ او لویدیځ کې زمونږ د پولو وضعیت پیچلی دی او کنټرول یې اسانه کار نه دی. زموږ ټوله هڅه د پولې ساتنو او هم جغرافیایي سازمان دا دی چې له ګاونډیو هېوادنو سره مناسب تعامل ولرو.»
هغه د ایران د سویل ختیځو پولو د تړلو په اړه وویل: «د دغه هېواد د پوځ او د بهرنیو چارو د وزارت او همداراز د افغانستان د امنیتی چارواکو په شتون کې څو ځلې خبرې اترې ترسره شوي او سرحدونه هم ټاکل شوي دي.»
ایران له افغانستان سره د سیستان بلوچستان، خراسان رضوي او سویلي خراسان ولایتونو کې ۹۴۰ کیلومتره ګډه پوله لري.
طالبانو لا تر اوسه د ایران دولت د دغه چارواکي د څرګندونو په اړه څه نه دي ویلي.
