ذبیح الله مجاهد د افغانستان په اړه د ملګرو ملتونو د امنیت شورا پرونۍ غونډې ته په غبرګون کې ویلي د افغانستان خلک د ملګرو ملتونو له سازمانه هیڅ تمه نه لري. د ملګرو ملتونو امنیت شورا پرون چهارشنبه د افغانستان د وضیعت په اړه غونډه رابللې وه.
د پنج شنبې په ورځ د (لیندۍ په ۳۰مه) د طالبانو تر واک لاندې د افغانستان ملي راډیو د طالبانو د ویاند ذبیح الله مجاهد یو غږیز پیغام خپور کړی، نوموړي په دغه پیغام کې د افغانستان په اړه د ملګرو ملتونو د امنیت شورا غونډې ته په غبرګون کې ویلي چې«د ملګرو ملتونو په سازمان کې د افغانستان څوکۍ دېراوسپارل شي او په رسمیت دې و پیژندل شو.»
د ملګرو ملتونو سازمان د چهارشنبې په ورځ د افغانستان په اړه غونډه کې د افغانستان لپاره د یوناما مشرې روزا اوتونبایوا په افغانستان کې د بشري حقونو وضیعت د اندېښنې وړ وباله.
خو د طالبانو تر واک لاندې د افغانستان ملي راډیو له لوري خپاره شوي پیغام کې ذبیح الله مجاهد ویلي چې«د خلکو او نظام په استازیتوب حق لري چې په ملګرو ملتونو کې د افغانستان څوکۍ ور وسپارل شي او په رسمیت وپيژندل شي.»
نوموړی وايي، که داسې ونه شي «موږ بیا له دغه سازمانه د عدالت تمه نه لرو.»
نوموړی د خپلو خپرو په دوام وايي، «دغه سازمان د لویو قدرتونو په خوښه کار کوي او په بې پرې توګه نړیوالې قضیي نه حلوي.»
نوموړي په دغه پیغام کې ویلي چي، د ګڼو هیوادونو سره سیاسي جوړجاړی لري او د هغوی سره ښې سوداګریزې اړیکې پالي.
دا په داسې حال کې ده چې ملګرو ملتونو د دریم ځل لپاره په دغه سازمان کې طالبانو ته د افغانستان د څوکۍ ورکول ځنډولي دي.
