ننګرهار کې د پوهنې ریاست د پخواني مامور شپږ کلن زوی تښتوونکو وژلی دی
د ننګرهار د پوهنې ریاست د پخواني کارکوونکي انګار مومند زوی الیاس مومند چې نېږدې شپږ کاله عمر لري، درې ورځې وړاندې د تښتوونکو له خوا تښتول شوی و؛ نن یې جسد موندل شوی دی.
د ننګرهار د پوهنې ریاست د پخواني کارکوونکي انګار مومند زوی الیاس مومند چې نېږدې شپږ کاله عمر لري، درې ورځې وړاندې د تښتوونکو له خوا تښتول شوی و؛ نن یې جسد موندل شوی دی.
د انګار مومند د کورنۍ یوه غړي افغانستان انټرنشنل - پښتو ته وویل، چې الیاس مومند په ننګرهار کې د تښتوونکو له خوا تښتول شوی و، چې وروسته له درېیو ورځو ورکېدو یې جسد موندل شوی دی.
نوموړي ویلي، چې غلو د الیاس مومند له کورنۍ پېسې غوښتې وې؛ خو د هغه له پلار انګار مومند سره په هغه اندازه پېسې نه وې او مخکې له دې چې د پېسو په اړه بیا خبرې وکړي، ماشوم تښتوونکو وژلی دی.
هغه وویل: " د ماشوم له پلار سره په دې وخت کې دومره پېسې نه وې او نه شته، ځکه د هغه یو پخوانی دولتي مامور و او ډېر عادي ژوند لري".
د نوموړي په خبره، چې تر دا مهاله د تښتوونکو په اړه هېڅ معلومات نه شته.
د ننګرهار لپاره د طالبانو امنیه قوماندانۍ دا پېښه تایید کړې؛ خو د پېښې د نوعیت په اړه یې څه ونه ویل.
د یادونې وړ ده، چې په دې وروستیو کې په ننګرهار کې د تښتونې پېښې زیاتې شوي دي، له دې وړاندې هم دوه سوداګر د تښتوونکو له خوا تښتول شوي وو، همدا راز د ننګرهار د سوداګرۍ خونې مرستیال هم په جلال باد ښار کې وژل شوی و.
یوې اسراییلي رسنۍ د خپلو سرچینو په حواله ادعا کړې، چې د سپاه پاسداران د قدس ځواک ۴۰۰یمه قطعه غواړي، چې په نورو هېوادونو کې د اسراییل پر اهدافو د بریدونو لپاره افغان ځانمرګي بریدګر استخدام کړي.
د اسرایيل حکومت تر دا مهاله د ایران له خوا د اسرایيلیانو د وژلو او تښتولو څو پلانونه شنډ کړي دي.
د یکشنبې په ورځ انټلي ټایمز د سپاه د افسرانو عکسونه، نومونه او د ټلیفون شمېرې خپرې کړي، چې په دې پلان کې دخیل دي.
د دغو اجنټانو څخه یو د علیرضا تاجک په نوم یو کس دی، چې د انټلي ټایمز په وینا؛ یو "ایرانی - افغان تبعه" دی، چې د قدس ځواک په ۴۰۰ یونټ کې کار کوي.
انټلي ټایمز وايي، چې هغه مخکې په جورجیا کې د یوه اسراییلي تبعه پر ضد په ناکامه ترهګریزه دسیسه کې لاس درلود.
اسراییلي رسنیو د ۱۴۰۱ کال په عقرب کې راپور ورکړی و، چې د قدس ځواک اجنټانو غوښتل چې یو اسراییلي سوداګر اتزیک موسی ووژني.
د دغو راپورونو له مخې؛ د ګرجستان امنیتي ځواکونو د یوه پاکستاني تبعه د چلند تر شک وروسته هغه نیولی او د هغه له کور څخه یې وسلې کشف کړې دي.
د دغه هېواد امنيتي ځواکونه هم په دې بريالي شوي، چې د دوو ايراني- ګرجستاني اتباع ونیسي، چې د دغو عملياتو لپاره يې د وسلو په برابرولو کې برخه لرله.
انټلي ټایمز وايي؛ حسین رحماني چې د ۴۰۰یمې قطعې بل غړی دی، د ماموریت لپاره د افغانانو په ګمارلو کې مهم رول لوبولی دی.
دغې رسنۍ د خپلو نورو اجنټانو حسین رهبان او حمید عبدالله نومونه هم روښانه کړي دي.
د قدس ځواک دغو دوو غړو له دې مخکې په جورجیا، تایلنډ او هند کې د اسراییلي اتباعو د وژلو او تښتولو په ماموریتونو کې لاس درلود.
په دې وروستیو کلونو کې ایران د نورو هېوادونو له اتباعو په تېره بیا د جنایتکارو ډلو له غړیو څخه په بهر کې د اسراییلو او ایراني اتباعو د وژلو او تښتولو لپاره استفاده کړې ده.
د طالبانو په لیکو کې یو شمېر بااعتباره سرچینو افغانستان انټرنشنل – پښتو ته ویلي، چې طالبانو په کابل کې د ټولنیزو رسنیو لپاره یو شمېر چلوونکي په دندو ګومارلي، چې په ټولنیزو شبکو کې د طالبانو په اړه تبلیغات او ضد تبلیغات وکړي.
په دغه راپور کې دوولس سرچینو د نوم د نه ښودلو په شرط ویلي، چې په کابل کې په درېیو جلا ډلو کې د طالبانو په اړه د مثبتو تبلیغاتو د کولو، د منفي تبلیغاتو د مخنیوي او د طالبانو د مخالفانو پر وړاندې د منفي غبرګون د ښودلو په موخه فیسبوک او ټویټر چلوونکي ګومارل شوي دي.
د سرچینو په خبره، د کورنیو چارو وزیر سراج الدین حقاني، د دفاع وزیر ملا یعقوب او د استخباراتو رییس عبدالحق وثیق ځانګړې او جلا ډلې لري، چې په ټولنیزو شبکو کې په بېلابېلو نومونو فعالیت کوي.
بدري مجازي فدایان
د ټولنیزو شبکو دا طالبي ډله د سراج الدین حقاني له خوا تمویلیږي، چې عمومي رهبري یې د طالبانو د کورنیو چارو د وزیر ورور انس حقاني کوي او اجراییوي چارې یې د طالبانو د کورنیو چارو پخوانی ویاند سعید خوستی کوي.
بدري مجازي فدایان په کابل کې درې دفترونه لري، چې لومړی او مرکزي دفتر یې په وزیر اکبر خان څوارلسم سړک کې موقعیت لري، دویم دفتر یې د کابل پوهنتون مخې ته او درېیم دفتر یې په احمد شاه بابا مېنه (ارزان قیمت) کې موقعیت لري.
د افغانستان انټرنشنل – پښتو سرچینې وايي، چې د بدري مجازي فدایانو په درېیو دفترونو کې نېږدې ۱۵۰ کسان په ۱۵ ډلو کې کار کوي، چې هره ډله یې ځانګړی نوم او دندې سرته رسوي.
سرچینه زیاتوي: “د کار ټول هدایات د سعید خوستي له خوا ورکول کیږي، هره ډله دوه دندې سرته رسوي، لومړۍ دنده دا چې د طالبانو په اړه باید مثبت تبلیغات وشي، کومې پروژې یا کارونه چې کیږي هغه باید انعکاس شي او دویم کار د ضد تبلیغاتو مخنیوی دی، د هرې ډلې شخص د طالبانو د مخالفانو شخصي اکاونټونه په نښه کوي او که چېرې د طالب په اړه څه لیکل کیږي نو دوی ورته منفي تبصرې لیکي.”
یاده سرچینه وايي، چې بدري مجازي فدایان په فیسبوک کې نېږدې پنځه سوه مستعار فیسبوک اکاونټونه، پاڼې او ګروپونه لري، چې له ټولو څخه په مختلفو چارو کې ګټه اخیستل کیږي، همداراز د ټویټر اته سوه په مختلفونو نومونو مستعار اکاونټونه هم لري، چې په مختلفو لارو د طالبانو مخالفان ځپي.
سرچینه وايي، چې د دې ډلې کار کوونکي له ۲۰ زره افغانیو نیولې تر ۱۱۰ زره افغانیو پورې میاشتیني امتیازات اخلي.
عمري مدافعان
دا ډله د طالبانو د دفاع وزیر ملا یعقوب اړوند ډله ده، چې د کابل په خوشحال خان مېنه، وزیر اکبر خان او شش درک کې دفترونه لري.
افغانستان انټرنشنل – پښتو ته رسېدلي معلومات ښيي، چې عمري مدافعان نېږدې۱۰۰ کسان دي، چې د هر یو میاشتنی امتیاز له ۲۰ زره افغانیو نیولې تر ۷۰ زرو افغانیو رسیږي.
د معلوماتو پر بنسټ دا ډله هم د سراج الدین حقاني د فیسبوکي ډلې په ډول کار کوي، د ملایعقوب کوچنۍ ویډیوګانې جوړوي او تر ډېره هڅه کوي، چې نوموړی د افغانستان رهبر معرفي کړي.
د افغانستان انټرنشنل – پښتو سرچینه وايي، چې د عمري مدافعانو ډله تر ډېره د ملا یعقوب په اړه مثبت تبلیغات کوي او هڅه کیږي، چې ملا یعقوب ته د ورپېښو منفي تبلیغاتو مخه ونیسي.
سرچینه زیاتوي: “عمري مدافعان چې مشري یې د ملي تلویزون یو پخوانی ژورنالېست کوي، تر ډېره فرد محوره تبلیغات کوي او هغه اشخاص په نښه کوي، چې د ملا عمر او یا هم ملا یعقوب پسې منفي خبرې لیکي.”
د معلوماتو له مخې؛ د عمري مدافعانو ډله په کوچنیو ډلو ویشل شوې ده، چې هره ورځ د ورځینو موضوعاتو په اړه په ټولنیزو شبکو کې روایتونه ارزیابي کوي او بیا یې پر وړاندې تبلیغ او ضد تبلیغ کوي.
اماراتي ابابیل
د افغانستان اڼټرنشنل – سرچینه وايي، چې دا ډله د طالبانو د حکومتي ساختار یوه برخه ده، چې په رسمي ډول د استخباراتو د بودیجې څخه ورته امکانات ورکول کیږي.
سرچینه وايي، چې اماراتي ابابیل د استخباراتو د رییس عبدالحق وثیق له خوا په خپله رهبري کیږي او دا ډله د طالبانو سیاسي مخالفانو پسې هره ورځ څار کوي.
د سرچینې په خبره، چې د طالبانو د استخباراتو ریاست د طالب مخالفانو د ټولنیزو رسنیو اکاونټونو په اړه معلومات راټولوي، هغه چې په بهر کې مېشت دي د هغوی پر وړاندې منفي تبصرې کوي او د هېواد دننه اشخاص ګواښي.
دا سرچینه وايي، چې اماراتي ابابیل له ځانه سره یو شمېر پاکستاني قراردادي هېکران هم لري او هڅه کوي، چې د ځینو مهمو اشخاصو او مخالفانو د ټولنیزو شبکو اکاونټونه هېک کړي.
له میټا سره جنجال
خو بل خوا دا درې واړه ډلې له د اکاونټونو د بندېدو له ستونزې سره هم مخ دي. د فېسبوک کمپنۍ د سېنګاپور دفتر یوه کارکوونکي د نوم د نه ښودلو په شرط افغانستان انټرنشنل – پښتو ته ویلي، چې د افغانستان د جمهوري نظام له ړنګېدو وروسته دوی د افغانستان د مخابراتو وزارت سره اړیکې پرې کړې دي.
دغه سرچینه وايي، چې د طالبانو د مخابراتو له وزارت څخه یې په تېرو دوو کلونو کې له سلو زیات ایمیلونه او غوښتنې تر لاسه کړي چې د شا او خوا ۱۷ سوه اکاونټونو، پاڼو او ګروپونو د بیا فعالېدو او بندیز لرې کېدو وړاندیز یې کړی دی.
د سرچینې په خبره، اکثر فیسبوک اکاونټونه او پاڼې د ټولنیزو معیارونو په نظر کې د نه نیولو له امله محدودې شوې او یا هم له منځه تللې وې؛ خو د طالبانو د مخابراتو وزارت یې د بیا فعالیدو او محدودیت د لرې کېدو غوښتنه کړې وه.
د طالبانو د مخابراتو په وزارت کې یوې سرچینې افغانستان انټرنشنل – پښتو ته تایید کړه، چې دغه وزارت په بار – بار هڅه کړې، چې له فیسبوک سره اړیکه وکړي؛ خو هغوی نه منفي او نه هم مثبت ځواب ورکوي.
هڅه مو وکړه، چې په دې اړه د طالبانو د کورنیو چارو وزیر سراج الدین حقاني، د طالبانو د دفاع وزیر ملا یعقوب او یا هغوی ته د نېږدې کسانو نظر هم را واخلو؛ خو له پرلپسې اړیکو نیولو ونه توانېدو.
د ترکیې پولیسو په بندري ښار چاناک کلا ښار کې ۶۳ تنه افغان کډوال "له یوه ټریلر او یوه میني بس" څخه نیولي دي. ترکي رسنیو ویلي، چې په نیول شویو کسانو کې ۱۳ ښځې، ۱۳ نارینه او ۳۷ ماشومان دي. په دې عملیاتو کې دوه کسان د «انساني قاچاق د تنظیمولو» په تور نیول شوي هم دي.
د راپور له مخې؛ نيول شوي کسان د ايواجيک د پوليسو د قوماندانۍ په مرکز کې له قانوني چلند وروسته د کډوالو توقيف ځايونو ته لېږدول شوي دي .
تر دې مخکې د ترکیې حکومت اعلان کړی و، چې یوازې د روان کال په لومړیو شپږو میاشتو کې یې د دغه هېواد له بېلابېلو ښارونو څخه ۲۴ زره او ۶۸۵ کډوال چې د اوسېدو رسمي اسناد یې نه لرل، نیولي او اېستلي دي.
ترکیه له ایران او پاکستان وروسته درېیم هېواد دی چې سلکونه بې اسناده افغانان یې نیولي او له دغه هېواد څخه یې باسي.
سرچینو افغانستان انټرنشنل ـ پښتو ته وویل، د طالبانو د لوړو زدکړو وزیر ندا محمد ندیم ننګرهار کې د روښان پوهنتون ادارې ته خبرداری ور کړی چې که بیا ملي سرود وغږوي پوهنتون یې بندوي. د ملي سرود غږولو له امله طالبانو د دې پوهنتون لس محصلین هم بندیان کړي وو، چې ۲ اوس هم ور سره دي.
طالبانو دوه ورځې وړاندې له هغه وروسته د ننګرهار مرکز جلال اباد کې د روښان خصوصي پوهنتون لس محصلین ونیول، چې په فراغت غونډه کې یې د ملي سرود غږولو او هغه ته د درناوي ویډیو خواله رسنیو کې خپره شوه.
په ننګرهار کې د روښان پوهنتون کې ځینو سرچینو نن افغانستان انټرنشنل ته وویل چې طالبانو تېره ورځ له لسو څخه اته نیول شوي محصلین خوشي کړل، خو دوه نور محصلین تر اوسه د طالبانو د استخباراتو ریاست په زندان کې دي.
دوی زیاتوي خوشي شوي محصلین طالبانو په زندان کې سخت شګنجه کړي دي او د بدن پر ځینو ځایونو یې سخت ټپونه لیدل کېدل.
سرچیتړ افغانستان انټرنشنل ـ پښتو ته وویل، د ملي سرود د ویډیو تر خپریدو وروسته د طالبانو د لوړو زدکړو وزیر ندا محمد ندیم د پوهنتون ادارې ته د ټلیفون له لارې خبرداری ورکړی، که بیا ورته کړنه تکرار شي نو د دوی پوهنتون به بند کړي.
وزیر په خپلو خبرو کې ویلي چې له دې وروسته که کومه ناسته کیږي ترپایه باید د طالبانو ځايي امنیتي مسوولین پکې حضور ولري.
سرچینې زیاتوي له هغه وروسته د طالبانو لخوا د ننګرهار روښان پوهنتون ټولې اداري شعبې تلاشي شوې دی او د یو بیرغ پیدا کېدلو سره د پوهنتون اداري مسوولین په مرګ کواښلي دی.
په ورته وخت کې طالبانو د پوهنتون مسوولانو ته امر کړی چې له کتابخونې څخه حنفي فقې پرته ټول کتابونه لرې کړي او ددې کار لپاره یو کمېټه ټاکل شوې ده.
په افغانستان کې د ملګرو ملتونو د بشري مرستو همغږۍ دفتر (اوچا) وایي، چې اروپایي ټولنه له افغانستان سره د ۳ میلیونه یورو مرسته کوي. اوچا نن په اېکس پاڼه کې لیکلي، چې دغه مرستې به د افغانستان د بشري مرستو د صندوق له لارې اړمنو کسانو ته ورکړل شي.
دا په داسې حال کې ده چې ملګرو ملتونو د یوه راپور په خپرولو سره ویلي، چې ښایي په را روان ۲۰۲۴ کال کې به ۲۳،۷ میلیونه افغانان بشردوستانه مرستو ته اړتیا ولري.
د ملګرو ملتونو د وړاندوینې له مخې، په ۲۰۲۴ کال کې به له ایران او پاکستان څخه شاوخوا ۱،۴۶ میلیونه نور افغان کډوال هم و اېستل شي.
اوچا د شنبې په ورځ هم د یوه راپور په خپرولو سره زیاته ویلي دي چې په جبري توګه له پاکستانه د کډوالو ستنیدو په افغانستان کې ستونزې زیاتې کړي دي.
سره له دې پر افغانستان د طالبانو له حاکمیت وروسته د بیلابیلو مرستندویه ادارو له خوا د میلیونونو ډالرو مرسته شوې خو بیا هم د افغانستان خلک له ناوړه اقتصادي شرایطو سره مخ دي او نړیوالې ادارې د بشري ناورین خبرداری ورکوي.
د کډوالو په چارو کې د ملګرو ملتونو عالي کمېشنري بیا پر یو شمېر مېرمنو د راتلونکي ژمي د تېرولو په موخه مرستې وویشلې.
دغې ادارې په اېکس ټولنیزه پاڼه کې د یو شمیر افغان میرمنو روان وضعیت انځور کړی خو دا چې له څومره میرمنو سره مرستې شوي څه نه دي ویلي.
د ملګرو ملتونو د شمېرو له مخې، په افغانستان کې اوسمهال څه باندې ۲۹ میلیونه وګړي بیړنیو بشري مرستو ته اړتیا لري.