د پاکستان د پوځ لوی درستیز وايي، امنیتي ځواکونه به راتلونکو ټولټاکنو کې د ټاکنو کمېسون مرسته وکړي. د پاکستاني پوځ د عامه اړیکو دفتر وايي، عاصم منیر د پنجشنبې په ورځ دا پرېکړه په اسلام اباد کې د مرکزي قومندانانو په غونډه کې وکړه.
د پاکستان د صوبايي او قامي اسمبلۍ او لومړي وزیر د ټاکلو لپاره ټولټاکنې راتلونکې فبرورۍ کې پر اتمه نېټه کېږي.
د پاکستان پوځ د دغه هېواد په سیاست په تېره ټاکنو کې ښکېل بلل کېږي او تل ورته ګوته نیول کېږي چې په خوښه یې ولسي چارواکي تر واک رسېږي.
پوځ ورته تورونه ردوي.
یو پاکستانی چارواکی د امیر خان متقي هغه ادعا ردوي، چې ګواکي اسلام اباد له پاکستاني طالبانو سره د سولې له خبرو وتلی دی. دغه چارواکي له نوم پرته پاکستانۍ ورځپاڼې ایکسپرېس ټریبیون ته ویلي، چې د سولې خبرې د "ټي، ټي، پي د بې قانونه او بې منطقه غوښتنو" له امله ناکام شوې دي.
دې پاکستاني چارواکي همداراز زیاته کړې ده، چې پاکستاني طالبان په خبرو کې هڅه کوي څو د دغه هېواد پر قبايلي سيمو واکمن شي.
تر دې مخکې یو شمیر پاکستاني رسنیو د پاکستاني سناتور مشاهد حسین له قوله ویلي وو، چې امیر خان متقي د فلسطین په اړه د تهران نړیوال کنفرانس په څنډه کې هغه ته ویلي و، چې د پاکستاني چارواکو او د تحریک طالبان د مشرتابه تر منځ له ځینې کتنو وروسته، پاکستان د قبایلي سیمو د قانوني اړخ پرته ډیری جنجالي مسایل حل کړي دي.
رپوټونو کې د امیر خان متقي له قوله ویل شوي، چې «ټي ټي پي غوښتل په خیبر پښتونخوا ایالت کې د قبایلي سیمو ادغام لغوه کړي، خو د پاکستان حکومت دا غوښتنه ونه منله او د خبرو له دوام یې ډډه وکړه." د طالبانو د بهرنیو چارو وزیر امیر خان موتاغي تر اوسه د دغو راپورونو په اړه څه نه دي ویلي.»
د طالبانو د بهرنیو چارو وزیر امیر خان متقي تر اوسه د دغو راپورونو په اړه څه نه دي ویلي.
اېکسپرېس ټریبیون ورځپاڼې د پنجشنبې په ورځ (د مرغومې ۷مه) راپور ورکړ چې د پاکستان یوه لوړ پوړي چارواکي چې نه یې غوښتل د موضوع د حساسیت له امله نوم یې واخیستل شي، د امیر خان متقي څرګندونې یې "بې بنسټه" وبللې او ویلي یې دي چې د نوموړي دا کیسه رښتیا نه ده.
سرچینې اېکسپرېس ټریبیون ته ویلي، «ایا موږ باید خپله خاوره دغو ترهګرو ته ورکړو؟ بلکل چې نه،» دغه چارواکي د خپلو خبرو پر دوام افغان طالبان "په دوه اړخیزو اړیکو کې د اوسني کړکېچ لپاره مسوول بللي دي.»
سرچینې اېکسپرېس ټریبیون ته ویلي چې د پاکستان تحریک طالبان د سولې خبرې د بیا تنظیمولو لپاره د یوې بهانې په توګه کاروي او د هغه په وینا دا یو بل لامل و چې د خبرو د پرمختګ مخه یې ونیوله.
دغه چارواکی وايي، چې پاکستان اوس روښانه دریځ خپل کړی او «د ټي ټي پي له ترهګرو سره به خبرې اترې ونه کړي.»
اسلام اباد د طالبانو د بهرنیو چارو وزیر هغه ادعا رد کړه، چې ویلي و پاکستان په وروستیو شېبو کې د تحریک طالبان پاکستان سره له هوکړې په شا شو. د پاکستان یو لوړ پوړي چارواکي ویلي، دغې ډلې هڅه کړې چې د قبایلی سیمو ځینې برخې تر کنټرول لاندې راولي.
تېره اونۍ په تهران کې د فلسطین په کنفرانس کې د طالبانود بهرنیو چارو وزیر امیر خان متقی او سناتور مجاهد حسین سید تر منځ د خبرو اترو په ترڅ کې متقی ادعا وکړه، چې د پاکستان او ټيټيپي تر منځ ډېرې مسلې په ۲۰۲۲ کې حل شوې.
هغه زیاته کړه، چې د شخړې یوازینی پاتې ټکی د پخواني فدرال اداره شوې قبایلي سیمو (فاټا) ادغام په اړه و.
د متقی په وینا، پاکستان هغه وخت له دغې هوکړې ووت، چې دواړه لوري د یوې هوکړې د وروستي کولو په درشل کې وو؛ خو یو پاکستاني چارواکي، د متقي دغه څرګندونې بې بنسټه وبللې او ویې ویل، چې د افغان ډیپلوماټ دغه خبرې ریښتینې نه دي.
د چهارشنبې په ورځ د اېکسپرېس ټریبیون سره په خبرو کې دغه چارواکي چې، د موضوع د حساسیت له امله د نوم د نه ښودلو په شرط خبرې کولې، څرګنده کړه چې خبرې اترې د ټيټيپي لهخوا د نا معقوله غوښتنو له امله ناکامې شوې.
دغه چارواکي دا روښانه کړه، چې د خبرو اترو تر پوښښ لاندې، د ترهګرې ډلې موخه دا وه چې د افغان طالبانو په خاموش ملاتړ سره په پخوانیو قبایلي سیمو کې خپله "امپراتوري" جوړه کړي.
دغه چارواکي ټینګار وکړ، پاکستان افغان طالبانو ته کافي وخت ورکړی چې د تحریک طالبان پاکستان ګواښ له منځه یوسي.
هغه وایي، موږ شواهد وړاندې کړل او په افغانستان کې مو د تحریک طالبان پاکستان د ترهګرو ځایونه په نښه کړل؛ خو د دغو هڅو سره سره، افغان طالبانو یوازې ژمنې وکړې او د ټيټيپي پر ضد په اساسي اقدام کې پاتې راغلل.
هغه زیاته کړه،ر چې پاکستان اوس روښانه دریځ غوره کړی دی: "له ترهګرو سره به خبرې اترې ونه شی."
د دغه چارواکي په وینا، افغان طالبان باید د ټيټيپي او د هغو د ملګرو پر وړاندې د تایید وړ ګامونه پورته کړي.
د پاکستان او افغانستان ترمنځ اړیکې په وروستیو میاشتو کې د پام وړ خرابې شوې، چې د اسلام اباد او کابل تر منځ د لوړې کچې ناندریو او تربګنیو زور واخیست.
په ملګرو ملتونو کې د پاکستان دایمي استازي منیر اکرام تېره اونۍ د ملګرو ملتونو د امنیت شورا په ناسته کې افغان طالبان تورن کړل، چې دوی ترهګرو ډلو ته پناه ورکړې او په پاکستان کې ټول وسلهوال بریدونه د طالبانو تر واک لاندې خاوره کې پلانیږي.
منیر اکرم دا هم وویل، چې نن سبا افغان طالبان نه یوازې پاکستان ته ګواښونه پېښوي؛ بلکې سیمې او نړۍ ته یې هم ګواښ پېښ کړی دی، هغه ادعا چې طالبانو په کلکه رد کړې ده.
له تېرې ورځې راهیسې د پاکستان بهرنیو چارو پخواني وزیر او تحریک انصاف ګوند د مخکښ غړي شاه محمود قریشي هغه ویډیو په ټولنیزو رسنیو کې لاس په لاس کیږي چې د راولپنډۍ له زندانه تر خوشې کېدو وروسته یې بیرته پولیس نیسي او په ناسم ډول یې ګاډي ته پورته کوي.
خو د پاکستان تحریک انصاف ګوند بیا له قریشي سره پر شوي چلند سخت په غوسه دی.
د چهار شنبې په ورځ د (مرغومي ۶مه) د پاکستان تحریک انصاف ګوند غړي او د پاکستان بهرنیو چارو پخواني وزیر شاه محمود قریشي هغه ویډیو پر ټویټر خپره شوه چې نوموړی د راولپنډۍ له زندانه تر خوشې کېدو سملاسي وروسته بیا ځلې د پولیسو له لوري نیول کیږي او په زور د پولیسو موټر ته پورته کړل کیږي.
نوموړی پولیسو ته د یو لیک په ښکاره کولو سره وايي چې د سترې محکمې په امر خوشی شوی او پولیس یې د نیولو حق نه لري، خو پولیس د نوموړي خبرې نه اوري او قریشي په کش کولو موټر ته پورته کوي.
له قریشي سره د پولیسو د داسې چلند په اړه ګڼو افغانانو پر ټولنیزو رسنیو خوښي ښودلې ده.
لیکوال او د ټولنیزو رسنیو فعال مجید قرار د پولیسو له لوري د قریشي د نیولو ویډیو شریکه کړې او لیکلي یې دي، «دا د افغانانو قاتلان دي، په دې رنګ بې عزتۍ یې د زړه له تله خوشحاله یو.»
همدارنګه دیني عالم او د سیاسي چارو شنونکي قاري عیسي محمد پر خپله ایکس پاڼه لیکلي چي، «ډیر مغرور او کبرجن انسان و، د جمهوریت په سقوط يې پر خلکو مټایان ویشل، طالبانو او پاکستاني پوځ ته یې مبارکیانې ورکولې، ډیر ژر یې کابل ته منډه کړه او په ارګ کې یې لکه خپل کور قدمونه واخیستل. نن یې د پولیسو له لوري دیکې خوړلې، زړه مې ورباندې یخ شو.»
بل خوا د پاکستان تحریک انصاف ګوند هم د پولیسو له لوري د قریشي د بیا ځلې نیول کیدو ته غبرګون ښودلی دی.
د تحریک انصاف ګوند غړی عمر ډار وايي، د یاد ګوند غړي د نواز شریف په لارښوونه په یو نوم او بل نوم بندیان کیږي. «نن د شاه محمود قریشي سره ډیر بد چلند وشو، نوموړی ذلیله شو،دا ټول د مسلم لیک ن کړنې دي هغوی جمهوریت تر پښو لاندې کوي قانون تر پښو لاندې کوي غواړي په ټګۍ او درغلیو ټاکنې ترسره کړي.»
شاه محمود قریشي د پاکستان د تحریک انصاف ګوند مخکښ غړی دی او نوموړی د عمران خان لپاره د عدالت غوښتنې په لاریونونو کې بندې شوی دی.
د اوکراین د لوی څارنوال دفتر د چهارشنبې په ورځ ( د مرغومې په ۷مه) وویل ،چې د روسي ځواکونو له خوا د درېیو اوکرایني جنګي بندیانو د اعدام په اړه اوکراین د جنګي جرمونو څېړنې پیل کړي.
چارواکو وویل، چې پېښه په روانې میاشت کې د سویل ختیځ زاپوریژیا سیمه کې د روبوټین کلي ته نېږدې شوې، یاده پېښه په ویډیویې بڼه ثبت شوې او په انلاین شکل لاس په لاس کیږي.
روسیې د دې تور په اړه څه نه دي ویلي.
په روانې میاشت کې دا دویم ځل دی چې روسیه د اوکراین د څارانوالانو له خوا تورنیږي.
د لوی څارانوال دفتر په یوه بیان کې ویلي؛ دا د جنګي بندیانو سره د چلند په اړه د نړۍوال بشردوستانه قانون څخه د یرغلګر هېواد له خوا د سرغړونې یوه بله قضیه ده.
اوکراین د ډسمبر په درېیمه روسیه وروسته له هغه په جنګي جرم تورنه کړه، چې په ټ\ولنیزو رسنیو کې یوه بله وو خپره شوه، چې په کې ښکاري څو سرتېري پر دوو تسلیم شويو نظامي پرسونل ډزې کوي چې له سنګر څخه د ټوپک په ډزو اېستل شوي وو.
په تېره مارچ میاشت کې یو نیول شوی اوکرایني سرتېری په یوه ویډیو کې د دې لپاره په ډزو ووژل شو، چې ویې ویل «ویاړ په اوکراین».
هغه جمله چې د جګړې له پیل راهیسې د عامو خلکو د ښه راغلاست په توګه ځانګړی اهمیت لري.
پاکستاني رسنیو د چهارشنبې په ورځ د پاکستان د ترهګرۍ پر وړاندې د مبارزې ادارې ته منسوب یو سند خپور کړی او لیکلي یې دي، چې په دیره اسماعیل خان کې د پولیسو پر یوه مرکز په برید کې وژل شوی ځانمرګی تېر کال د تورخم له لارې افغانستان ته تللی و او په پټه بېرته پاکستان ته راغلی و.
د نیوز انټرنشنل ورځپاڼې د راپور له مخې؛ د پاکستان د ترهګرۍ پر وړاندې د مبارزې ادارې څېړنې ښيي چې د دېره اسماعیل خان اصلي بریدګر صفت الله د پاکستان د لکی مروت سیمې د سرای نو رنګ کلي اوسېدونکی و، چې د تورخم له لارې افغانستان ته د تېرې لیندۍ میاشتې په ۲۱ نېټه تللی و.
دغه هېواد چارواکي وايي؛ پاکستان ته د هغه د قانوني راستنېدو هېڅ سند نه شته او داسې ښکاري چې صفت الله په پټه بېرته پاکستان ته راغلی و.
رسنیو راپور ورکړی، چې د ترهګرۍ پر وړاندې د مبارزې ریاست نوموړی د هغه موټر د سیریل نمبر او د هغه سیم کارتونو له لارې وپېژاند چې څو ورځې وړاندې یې د پاکستان په څو ځایونو کې کارولي وو.
د لیندۍ په ۲۱ مه د خېبر پښتونخوا ایالت په دېره اسماعیل خان کې د شپږو ځانمرګو بریدګرو یوې ډلې د پاکستان د امنیتي ځواکونو پر یوه مرکز برید وکړ.
د پاکستان پوځ ویلي؛ بریدګرو لومړی له چاودېدونکو توکو ډک موټر د امنیتي ځواکونو د اډې ودانۍ سره چاودولی، چې لږترلږه ۲۳ پوځیان یې وژلي او لسګونه نور یې ټپیان کړي دي.
د دې پېښې پړه تحریک جهاد پاکستان پر غاړه اخیستې ده.
د پاکستان د ترهګرۍ ضد ادارې د لیندۍ په ۳۰ مه اعلان وکړ، چې دوه ځانمرګي برید کوونکي افغانان وو.
د دې ادارې د معلوماتو له مخې؛ د شپږو افغانانو په ګډون ۹ تنه د دغه برید د «اسانتیا» په تور نیول شوي دي.
په دې ځانمرګو کې یو هم حسن افغاني چې په شاکر مشهور و، په دېره اسماعیل خان کې له ځانمرګي برید مخکې یو ویډیويي پیغام خپور کړ.
دغې ادارې دا هم ویلي، چې په برید کې د وژل شوي بل ځانمرګي بریدګر چې صفت الله مروت نومېږي، د هویت کارت او د اوسېدو ځای دا ثابتوي چې بریدګر "د یوه ګاونډي هېواد سره تعلق لري".
په دغو اسنادو کې ویل شوي چې د صفت الله مروت پلار تایید کړې چې زوی یې د افغانستان د طالبانو له اسلامي امارت سره تړاو لري.
پاکستاني چارواکو ویلي، چې د پاکستاني طالبانو جنګیالي په افغانستان کې دي او له هغه ځایه پر پاکستاني امنیتي ځواکونو بریدونه پلانوي.
خو طالبانو د پاکستاني چارواکو دغه څرګندونې رد کړې دي.