د مسکو یوې محکمې د پنجشنبې په ورځ دوه روسي شاعران د انتقادي شعرونو د لیکلو په تور له پنځه نیمو تر اوو کلونو بند محکوم کړل. دا دوه شاعران د تېر کال په سپټمبر میاشت کې د مسکو یوه مشاعره کې له ګډون وروسته نیول شوي وو.
ارتیوب کاماردین او اېګور شتوبا لومړی "نفرت ته د هڅولو"تر تعقیب لاندې ونیول شول او بیا "په عامه توګه د ملي امنیت پروړاندې د فعالیتونو پرضد" تورن شول.
تر دې مخکې هم په روسیه کې سیاسي او مدني فعالان د "ملي امنیت پر ضد عمل" یا "چارواکو ته د سپکاوي" په تور نیول شوي او محاکمه شوي دي.
د روسیې دولت هڅه کوي چې پر رسنیو او خپلواکو نادولتي سازمانونو د بندیزونو په لګولو سره د دغه هېواد سیاسي فضا خپل کنټرول کې وساتي.
د روسیې دولت همداراز هڅه کوي چې د ځینو قوانینو په تصویبولو سره د دې هیواد سیاسي فضا او د بیان ازادي محدود کړي.
په روسیه کې د اختلافي غږونو ځپل د بشري حقونو د سازمانونو له توند غبرګون سره مخ شوی دی.
د بښنې د نړیوال سازمان په ګډون د بشري حقونو سازمانونو دغه کړنې غندلي او د نیول شویو سیاسي او د مدني فعالانو د ژر تر ژره خوشې کېدو غوښتنه یې کړې ده.
