د طالبانو د کډوالو او ستنیدونکو چارو وزیر خلیل الرحمن حقاني وايي، مدرسې باید یوازې د دیني مسایلو تر تدریس پورې محدودې نه شي. حقاني د پکتیا په یوه جهادي مدرسه کې په جوړو شویو مراسمو کې وویل چې په مدرسه کې باید پر دیني زدکړو سربېره جهادي او نظامي فکرونه هم تدریس شي.
د طالبانو د کابینې دغه غړي د جهادي افکارو او دیني مهارتونو د زدکړې موخه د "اسلام او هیواد" د دفاع لپاره د زدکوونکو چمتو کول ګڼلي دي.
د طالبانو تر کنټرول لاندې د باختر خبري آژانس د جدي په ٩مه، خبر ورکړ چې خليل الرحمن حقاني په دې غونډه کې وويل چې طالبان به اجازه ور نه کړي چې په افغانستان کې له اسلامي نظام پرته بل نظام رامنځته شي.
نوموړي د پکتيا د يوې جهادي مدرسې د زدکوونکو د فراغت په مراسمو کې د وينا پر مهال زياته کړه، چې د مدرسو او جوماتونو پراختيا د هر چا دنده ده.
د طالبانو د مهاجرت وزیر غوښتنه وکړه چې په لرې پرتو کلیو کې دیني مدرسې جوړې شي.
په تېرو دوو کلونو کې طالبانو د افغانستان په بېلابېلو ولایتونو کې لسګونه جوماتونه او مدرسې جوړ کړی دي.
پر دې سربېره د طالبانو د پوهنې وزارت د انستیتیوتونو او ښوونځیو په ګډون ډېر ښوونیز مرکزونه په جهادي مدرسو بدل کړي دي.
د تخار دولتي تخنیکي او مسلکي انستیتوت، په خوست ولایت کې د عبدالحی حبیبي لیسه، په کندهار کې تخنیکي لیسه، د پکتیا ولایت په ګردیز ښار کې د ببرک خان ځدراڼ عالي لېسه، په مزار شریف ښار کې د میترا خصوصي تلویزیون ودانۍ، په هرات کې د ښوونکو د روزنې انستیتوت او سمنګان د هغو له جملې څخه دی چې په جهادي مدرسو بدل شوی دی.
د ۱۴۰۱ کال د جوزا په میاشت کې طالبانو د دې ډلې مشر هبت الله اخندزاده ته منسوب یو پیغام خپور کړ چې په کې ویل شوي وو چې د افغانستان په ټولو ولسوالیو کې باید دیني مدرسې جوړې شي.
