روسیې د دوشنبې په ماښام پر اوکراین د بې پیلوټه الوتکو تر ټولو لوی برید ترسره کړي. ۹۰ بې پیلوټه الوتکو په یو وخت د اوکراین ځینې ښارونه بمبار کړي او په اودیسا سیمه کې یې یو ۱۵ کلن هلک وژلی دی.
د اوکراین هوايي ځواکونو ویلي، د بې پیلوټه الوتکو بریدونو په داسې حال کې بېلابېلې سیمې په نښه کړي، چې روسیې پر خارکیف، خرسون او زاپوریژهیا سیمو باندې توغندي هم توغولي دي.
د اوکراین پوځ ویلي، چې د دوی هوايي دفاعي سیسټم په ټولو سیمو کې کار کړی او ۸۷ بې پیلوټه الوتکې یې نسکورې کړې دي.
د هوایي ځواک په اعلامیه راغلی: "د روسیې هوایي برید د دفاعي ځواکونو د ګرځنده اور وژونکو ډلو، جنګي الوتکو او د هوایي ځواک د الوتکو ضد توغندیو سیسټمونو له خوا خنثا شو دی."
په خارکیف سیمه کې د الوتکو ضد څلور لایزري توغندي، درې د رادار ضد توغندي او یو د روسیې کروز توغندی په خرسون او زاپوریزیا سیمو کې لګیدلي دي.
اوکرایني چارواکي وايي، روسیه په قصدي توګه د استوګنې سیمې په نښه کوي.
د اودیسا والي اولیګ کیپر پر تلیګرام خپور کړي پیغام کې لیکلي: "پر نیمه شپه، دښمن په قصدي توګه د اودیسا په سیمه کې پر استوګنو سیمو د بې پیلوټه لوتکو بریدونه وکړل، چېرې چې خلکو په خپلو کورونو کې له خپلو کورنیو سره نوی کال نمانځه."
د نوموړي په وینا؛ په دې بریدونو کې یو ۱۵ کلن ماشوم وژل شوی او بل ژوبل شوی دی. په برید کې لږ تر لږه ۳ لوړ پوړي ودانۍ، ۳ شخصي کورونه او د کرنې ودانۍ زیانمنې شوې دي.
