د جمهوري دولت د سولې د مذاکراتي ټیم غړی محمد ایوب انصاري کابل ته ستون شو
له افغان شخصیتونو سره د طالبانو د اړیکو کمېسیون ویلي، چې په دوحه کې د تېر حکومت د سولې د مذاکراتي ټیم غړی محمد ایوب انصاري له ترکیې څخه افغانستان ته راستون شوی.
له افغان شخصیتونو سره د طالبانو د اړیکو کمېسیون ویلي، چې په دوحه کې د تېر حکومت د سولې د مذاکراتي ټیم غړی محمد ایوب انصاري له ترکیې څخه افغانستان ته راستون شوی.
د طالبانو تر واک لاندې ملي راډیو ټلویزیون د یوه خبر په خپرولو سره ویلي، چې نوموړی له افغان شخصیتونو سره د طالبانو د اړیکو کمېسیون په هڅو راغلی دی.
د دغه کمېسیون مشري چې د طالبانو د کانونو او پېټرولیم وزارت سرپرست مولوي شهاب الدین دلاور کوي، دوه کاله مخکې جوړ شو او د یاد کمېسیون په هڅو سره تر اوسه ۷۶۲ کسان ستانه شوي دي.
یو شمېر سیاسي څېرې چې په دغه موده کې هېواد ته ستانه شوي وو، بېرته له هېواد څخه وتلي دي.
د راپورونو له مخې؛ دغه کسان د خپلو جایدادونو او په بانکونو کې د خپلو پیسو د تر لاسه کولو په موخه هېواد ته ستانه شوي وو، چې د پیسو له تر لاسه کولو وروسته بېرته له هېواده وتلي دي.
سره له دې چې پر افغانستان د طالبانو له واکمنۍ وروسته د دغې ډلې له خواعمومي عفوه اعلان شوه خو تراوسه هم ډیر شمیر پخواني دولتي کارکوونکي او پوځیانو د طالبانو له خوا نیول کیږي او ځورول کیږي.
