د پښتونخوا ملي عوامي ګوند مشر محمود خان اڅکزي بیا د پاکستان له حکومته وغوښتل چې د پاسپورت نه عملي کولو لپاره د چمن پرلت غوښتنې ومني. محمود خان اڅکزي نن په بلوچستان کې یوه ټاکنیزه غونډه کې زیاته کړه: «خلک د پاسپورټ مخالف نه دي، خو خپل کور ته په پاسپورټ هیڅوک هم نه ځي.»
هغه په خپلو خبرو کې زیاته کړه: «چمن مې کور دی چې پر ډیورنډ کرښه پښه اړوم، هلته مې ځمکه ده کرونده پرې کوم، غنم کوم، دا به څو وارې د ورځې ما ته پر پاسپورټ ټاپه وهې او زه به ځم.»
په چمن کې له څه باندې اویا ورځو د پاکستان د دې غوښتنې خلاف پرلت روان دی چې له سپین بولدک سره دې د تګ راتګ لپآره د پاسپورټ پیلولو له غوښتنې په شا شي.
پاکستان کې د سرپرست حکومت له جوړېدو راهیسې پر چمن سربېره د وزیریستان او پکتیکا ترمنځ پر انګور اډه هم د پاسپورټ تګ راتګ پیلولو هڅې کېږي چې په مقابل کې یې هلته هم پرلت پیل شوی دی.
ځايي خلک وايي، د کرښې دواړو غاړو ته ژوند لري او هره ورځ دواړو خواوو ته تګ راتګ پر پاسپورت نشي کولی.
د پاکستان حکومت تراوسه د دې خلکو د غوښتنو په مقابل کې کوم نرمښت نه دی ښودلی.
په دې غونډه کې محمود خان اڅکزي پر حکومت غږ وکړ چې د خلکو غوښتنې ومني او زیاته یې کړه چې که پاکستان چلولو غواړي، نو په زور کلي نه کېږي.
د هغه په خبره، حکومت د ولس مور بلل کېږي او پکار ده چې د دوی غوښتنې ومنل شي
