د افغانستان د شمالې ولایت بلخ د صنعت او سوداګرۍ ادارې مسولين وايي، چې د دې ولایت په ۱۷۰۰ صنعتي فاريکو کې شاوخوا ۳۰ زره کسان په دندو بوخت دي. بل لورې ته بيا د افغانستان په ډېرو برخو کې د ځوانانو لويه برخه د کار د نه شتون له کبله مايوسه شوي او پر کورنو ناست دي.
د بلخ د طالبانو د صنعت او سوداګرۍ ادارې مشر نن سې شنبه د طالبانو تر واک لاندي باختري خبري اژانس سره په مرکه کې ويلي، چې په دې ولایت کې تېر کال ۲۰۰ توليدي فابرېکو ته نوي جوازونه او د فعالت اجازه ورکول شوې.
د طالبانو د دې ادارې مشر امام الدین سنايي وايي، چې د ښار او ولسواليو په درېيو صنعتي ښارګوټو کې ۱۷۰۰ توليدي فابرېکې فعاله دي او تر ۳۰ زره پوري کسان په کار بوخت دي.
د سنایي په خبره؛ له دې توليدي فابرېکو څخه د غذايي موادو او مشروبات تر څنګ ۶۴ بېلا بېل مواد توليديږي.
نوموړي د ځان بسايني لپاره هيله مندي وښوده او له واکمني ډلې يې وغوښتل، چې په کور دننه افغاني تولیدات استعمال او ورته بازار پيدا کړي.
واک ته د طالبانو په رسېدو د ځوانانو لويه برخه بې دندو شوې او د کار په پيدا کولو کې لالهانده هڅې کوي.
