د طالبانو د اطلاعاتو او فرهنګ وزير خيرالله خېرخوا هرات ته د يوه سفر پر مهال د دغه ولايت له تاريخي ګودامونو څخه د ليدنې په ترڅ کې د هرات د تاريخي ابدو په ساتنه او بيارغاونه ټينګار کړی دی. دغه طالب چارواکي ویلي، چې د هرات تاریخي ګودامونه به د لاسي صنایعو په بازارونو بدل شي.
د هرات تاريخي ګودامونه چې د (ګودام) په نوم ياديږي؛ د دغه ولایت له تاريخي ودانيو څخه شمېرل کېږي، چې د امیر عبدالرحمان په وخت کې د غله جاتو د ذخيره کولو لپاره جوړ شوي وو.
دغه ګودامونه د هرات په ښار کې د ۱۴ زره متره مربع مساحت په لرلو سره اوس هم شته.
طالبان چې د باميانو د بودا مجسمو او نورو لرغونو اثارو په ویجاړولو کې نوم لري خبر ورکړی، چې په راتلونکي کې به د هرات له تاريخې ابداتو څخه د نندارتونو د جوړولو تر څنګ په بېلابېلو فرهنګې برخو کې کار اخلي.
د طالبانو د اطلاعاتو او فرهنګ وزير د هرات له تاريخي اثارو څخه د ليدنې پر مهال وويل، چې وزارت يې هڅه کوي څو د هرات تاريخي ابدات د سيلانيانو د راجلبولو په موخه په کورني بازار بدل کړي.
په هرات ولایت کې وروستیو زلزلو د دغه ښار ځینې ارزښتناک او ساتل شوي تاریخي اثار هم زیانمن کړي دي.
تر دې مخکې د طالبانو د اطلاعاتو او فرهنګ مرستیال وزیر سن پیترزبورګ ته د سفر پر مهال له روسیې غوښتي وو، چې د افغانستان د تاریخي اثارو د بیارغونې په برخه کې دې له دوی سره مرسته وکړي.
د افغانستان د تاريخي ابداتو له منځه وړل او ویجاړول د ملګرونو ملتونو د تعليمي، علمي او فرهنګي ادارې يونسکو له اندېښنو څخه دي.
