د ایران د کورنیو چارو وزرات وایي، چې د کرمان په ښار کې د دوو ځانمرګو بریدونو څخه یو بریدګر د تاجکستان تبعه دی چې د ترکیې له لارې افغانستان ته تللی و. دا بریدونه چې قاسم سلیماني د مړیني د تلین په مراسمو کې ترسره شول په تړاو یې ۳۵ کسان د ایران له څو ولایتونو څخه نیول شوي.
د ایران د کورنیو چارو وزارت د مطبوعاتي اعلامیې له مخې؛ د دغه برید اصلي طرح کوونکی تاجک تبعه عبدالله تاجکي دی، چې له یوې مېرمنې او ماشوم سره په ناقانونه توګه د هېواد له جنوبي پولې کرمان ولایت ته داخل شوی دی.
همداراز عبدالله تاجکی د بم جوړولو ماهر هم دی او له برید دوه ورځې وړاندې له هېواده وتلی و.
مطبوعاتي اعلامیه د دوو ځانمرګو برید کونکو څخه د یوه کس هویت په ډاګه کړی.
تاجک تبعه ۲۴ کلن بازروف (بوزروف) د ټیلیګرام له لارې له داعش (اسلامي دولت) سره په تماس کې شو، چې د ترکیې څخه افغانستان ته لاړ او له افغانستان څخه په ناقانونه توګه ایران ته داخل شو.
هغه کله چې افغانستان ته لاړ بدخشان کې مېشت شو، چیرته چې د داعش له (ISKP) څانګې سره یوځای شو. داعش هغه د سراوان ښار له لارې ایران ته واستاوه. له هغه وروسته د کرمان ښار کې مېشت شو او د برید لپاره په تمه و. د دویم بریدګر هویت لا نه دی معلوم.
خو د ایران په کرمان، سیستان بلوچستان، خراسان رضوي، اصفهان، تهران او لوېدیځ اذربایجان په ګډون د هېواد په څو ولایتونو کې د دغه برید په تړاو ۳۵ کسان هم نیول شوي دي.
د ایران د کورنیو چارو وزارت ویلي، چې په دې وروستیو کې په مشهد ښار کې د یوه بل ځانمرګي برید مخه نیول شوې ده.
