د ملګرو ملتونو د همغږۍ دفتر د غزې د روغتیا وزارت په حواله لیکلي، چې د غزې پر تړانګه د اسراییل په بریدونو کې د وژل شویو کسانو شمېر ۲۳۴۶۹ او د ټپیانو شمېر ۵۹۶۰۴ کسانو ته لوړ شو. اوچا وایي، د دغو قربانیانو ۷۰ سلنه یې ښځې او ماشومان دي.
په ورته مهال په بریتانیا کې د اکسفام مرستندویه ټولنې اعلان وکړ، چې په غزه کې هره ورځ د قربانیانو شمېره د ۲۱مې پېړۍ تر ټولو جګړو لوړه ده.
د اکسفام په حواله د الجزیرې د راپور له مخې:« د اسراییل پوځ په منځنۍ توګه د ورځې ۲۵۰ فلسطینیان وژني او په غزه کې د وروستیو ټولو لویو جګړو پرتله په ورځني ډول د قربانیانو شمېره خورا لوړه ده.»
اكسفام ويلي، دغه ناورین د مرستو لېږدولو په بهیر کې د اسراییل د محدودیتونو له امله مخ پر زیاتېدو دی.
د دغه بنسټ په وینا، غزې ته په اونۍ کې د خوراکي توکو یوازې لس سلنه واردېږي.
