امریکا او بریتانیا د اسټرالیا، بحرین، کاناډا او هالند په ملاتړ په یمن کې د حوثیانو په مورچلو بریدونه کړي. دغه بریدونه د یمن په بېلابېلو سیمو له هغې ډلې په صنعا، صعده، حدیده او ذمار کې شوي دي.
د ایران په ملاتړ د حوثیانو پر مورچلو د امریکا او بریتانیا د بریدونو له پیلېدا سره هم مهاله د یمن په ښارونو کې د چاودنو راپورونه ورکړل شوي دي.
العربیه شبکې خبر ورکړی، چې د حوثیانو پر مورچلو د امریکا او بریتانیا په بریدونو کې لوژیستیکي مرکزونه او د دغې ډلې هوايي دفاعي سیسټمونه په نښه شوي دي.
یو امریکايي چارواکي رویټرز ته ویلي، دغه بریدونه د الوتکو، کښتیو او اوبتلونو له لارې ترسره کېږي.
حوثي چارواکي عبدالقادر المرتضی د اېکس په پاڼه لیکلي، چې امریکايي او بریتانوي ځواکونو د صنعا، صعده، حدیده او ذمار کې ځینې سیمې په نښه کړې دي.
جوبایډن ویلي، د امریکا او بریتانیا ځواکونو د اسټرالیا، بحرین، کاناډا او هالنډ په ملاتړ د حوثیانو سنګرونه په نښه کړي او بریدونه یې پرې کړي دي.
د امریکا ولسمشر ویلي، دغه بریدونه د حوثیانو د بریدونو په ځواب کې چې پر نړۍوالو کښتیو یې په سره سمندرګي کې کړي و، ترسره شوي دي.
د بریتانیا لومړي وزیر هم ویلي، چې هېواد یې د امریکا سره په ګډه د حوثیانو د پوځي ځواک د کمزوري کولو او د نړۍوالو کښتیو د ساتنې په موخه په یمن کې بریدونه کړي دي.
ریشي سونک زیاته کړه، د نړۍ والې ټولنې د پر له پسې خبرداریو سره، سره حوثیانو په سره سمندرګي کې خپلو بریدونو ته دوام ورکړی.
د حوثیانو یو چارواکي چې ویل کېږي د دغه هېواد د بهرنیو چارو مرستیال وزیر دی، د امریکا او بریتانیا د بریدونو په غبرګون کې ویلي، چې دغه هېوادونه به د دغو بریدونو درنه بیه پرې کړي.
حسین العزي د المسیره ټلویزیونې شبکې سره دغه بریدونه «ښکاره تجاوز» بللی دی.
