د چین شینهوا خبری آژانس د راپور له مخې، د جمعې په ورځ د چین د مرکزي هینان ولایت د پینګ دینګشان ښار کې د ډبرو سکرو په یوه کان کې د چاودنې له امله اته کسان وژل شوي او 15 نور لادرکه دي.
د سیمه ییزو چارواکو په وینا په داسې حال کې چې لا په کان کې د ژغورنې عملیات روان دي، لومړنۍ څېړنې ښيي چې پېښه په ځايي وخت د ماسپښین شاوخوا ۳:۰۰ بجې د ډبرو سکرو او ګازو د چاودنې له امله رامنځ ته شوې ده. د ډبرو سکرو دغه کان د پینګدینګشان ټایټان کمپنۍ ملکیت دی.
د بیړنيو حالاتو د مدیریت ادارې په وینا، د چاودنې پر مهال په کان کې 45 کسان وو چې اته یې مړه شوي او 15 نور لادرکه دي، خو د پاتې ۲۲ کسانو سره د ژغورونکو له خوا اړیکه ټینګه شوې ده.
د چارواکو له خولې ویل شوي چې د پیښې پر محال د ځمکې لاندې په بیلابیلو کانونو کې ټولټال 425 کسانو کار کاوه، او 380 کسان تر چاودنې وروسته له کانونو راویستل شوي دي.
