ایراني چارواکي وايي، له عراق سره د دغه هېواد په پوله کې د ماین چاودنې له امله یو افغان ووژل او څلور ټپیان شول. د مهران ولسوال وايي، دا کسان وړمه شپه په تیاره کې عراق ته ننوتل، چې له ماینونو ډکه سیمه کې چاودنه پرې وشوه.
علي عباس شفیعي له ایرنا سره په خبرو کې زیاتوي، له چاودنې وروسته یې له عراقي ځواکونو سره په همغږۍ ماین شنډوونکي سیمې ته واستول او له ساعتونو هڅو وروسته یې مړی او ټپیان د مهران امام حسین روغتون ته ولېږدول.
نوموړی د ټپیانو د حالت په هکله له څه ویلو پرته وایي، څلور ټپیان وروسته ایلام ښار ته ولېږدول شول.
دا لا مالومه نه ده چې پر دې کسانو یو که څو ماینونه چاودلي دي، خو د ایلام د سرې میاشتې مشر وايي، چاودنه له ماینونو د ډکې سیمې په منځ کې شوې وه او په دې دلیل یې د پېښې ځای ته دوه ډلې لېږلې وې.
د غلام رضا علي محمدي په خبره، له پنځو ګړیو هڅو وروسته د ایران او عراق د پوله ساتو په همکارۍ په دې وتوانېدل چې مړی او ټپیان په خوندي ډول د پېښې له ځای ولېږدوي.
لا هم مالومه نه ده چې دا افغانان عراق ته د څه لپاره تلل، خو د ترکیې او ایران په ګډه پوله کې د امنیتي تدابیرو زیاتېدو سره اوس افغانان د ایران د نورو ګاونډیو هېوادونو له لارې اروپا ته د تللو هڅه کوي.
